विवादास्पद व्यवसायी दीपक भट्टसहित २९ जनाविरुद्ध सम्पत्ति शुद्धीकरण कसुरमा मुद्दा चलाउन सिफारिस गरिएको छ।
सम्पत्ति शुद्धीकरण अनुसन्धान विभागले भट्ट, सुलभ अग्रवालसहित २९ जनाविरुद्ध मुद्दा चलाउनुपर्ने भन्दै सरकारी वकिलको कार्यालयमा अनुसन्धान प्रतिवेदन बुझाएको हो। विभागले उक्त प्रतिवेदन वैशाख दोस्रो साता नै बुझाइसकेको जनाइएको छ।
प्रतिवेदनमा इन्फिनिटी होल्डिङ्सका अध्यक्ष दीपक भट्ट, जगदम्बा होल्डिङका अध्यक्ष सुलभ अग्रवाल, उनकी श्रीमती सुभी अग्रवाल, शंकर ग्रुपका अध्यक्ष शंकरलाल अग्रवाल, जगदम्बा ग्रुपका अध्यक्ष शाहिल अग्रवाल तथा नेपाल उद्योग वाणिज्य महासंघका पूर्वअध्यक्ष शेखर गोल्छासमेतविरुद्ध मुद्दा चलाउन सिफारिस गरिएको छ।
त्यस्तै जावलाखेल ग्रुपका प्रबन्ध निर्देशक राजबहादुर शाह, हिमालयन रि–इन्स्योरेन्सकी प्रमुख कार्यकारी अधिकृत उपासना पौडेल, रमेश कर्पका उपाध्यक्ष रोहित गुप्ता, व्यवसायी ऋषिराज मोर, सन्दीप चाचानलगायत अन्य व्यक्तिहरूको नाम पनि प्रतिवेदनमा समावेश गरिएको छ।
विभागका अनुसार उनीहरूमाथि करिब २० अर्ब रुपैयाँ बिगो कायम गरी मुद्दा चलाउन सिफारिस गरिएको छ। प्रारम्भिक अनुसन्धानअनुसार उक्त समूहले हिमालयन रि–इन्स्योरेन्ससहित पाँच कम्पनीमार्फत करिब ३ अर्ब ७३ करोड रुपैयाँ गैरकानुनी रूपमा सारेर प्रतिस्पर्धी कम्पनीमा सेयर खरिद गरेको देखिएको बताइएको छ।
हाल सरकारी वकिलको कार्यालयले विभागले बुझाएको अनुसन्धान प्रतिवेदन अध्ययन गरिरहेको छ।
अब प्रतिवेदनको आधारमा मुद्दा अघि बढाउने वा नबढाउने विषयमा अन्तिम निर्णय सरकारी वकिल कार्यालयले गर्नेछ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
