राष्ट्रिय स्वतन्त्र पार्टी (रास्वपा) का सभापति रवि लामिछानेले भारत भ्रमणका क्रममा भारतीय प्रधानमन्त्री नरेन्द्र मोदीसँग भेटवार्ता गरेका छन्।

बुधबार नयाँ दिल्लीमा भएको भेटमा दुई देशबीचको सम्बन्ध, सहकार्य र साझा भविष्यका विषयमा छलफल भएको जनाइएको छ। भेटवार्तामा भारतका राष्ट्रिय सुरक्षा सल्लाहकार अजित डोभाल, विदेशमन्त्री डा. एस. जयशंकर तथा विदेश सचिव विक्रम मिस्री पनि उपस्थित थिए।

भेटपछि भारतीय प्रधानमन्त्री मोदीले सामाजिक सञ्जालमार्फत प्रतिक्रिया दिँदै लामिछानेसँगको भेटप्रति खुशी व्यक्त गरेका छन्। उनले साझा र समृद्ध भविष्यका लागि मिलेर काम गर्ने लामिछानेको चाहनालाई स्वागत गर्दै त्यसमा आफू पूर्ण रूपमा सहमत रहेको बताएका छन्।

मोदीले नेपाललाई भारतको ‘नेबरहुड फर्स्ट’ नीतिअन्तर्गत प्राथमिक साझेदारको रूपमा उल्लेख गर्दै दुई देशबीचको विशेष र बहुआयामिक सम्बन्धलाई अझ सुदृढ बनाउन नयाँ सरकारसँग सहकार्य गर्न उत्सुक रहेको बताएका छन्।

यसअघि लामिछानेले मंगलबार भारतीय जनता पार्टी (भाजपा) का अध्यक्ष नितिन नवीन, भारतीय गृहमन्त्री अमित शाह तथा विदेशमन्त्री एस. जयशंकरसँग पनि भेटवार्ता गरेका थिए।

जेठ १८ गते भारत पुगेका लामिछानेको भ्रमणका क्रममा विभिन्न राजनीतिक तथा कूटनीतिक भेटघाट भएका छन्। उनी जेठ २२ गते स्वदेश फर्कने कार्यतालिका रहेको छ।

लामिछाने नेतृत्वको प्रतिनिधिमण्डलमा उनकी पत्नी निकिता पौडेल, रास्वपाका सहमहामन्त्री विपिनकुमार आचार्य, सचिवालय सदस्य दीपक बोहरा तथा स्वकीय सचिव प्रदीप आचार्य सहभागी रहेका छन्।