राष्ट्रिय स्वतन्त्र पार्टी (रास्वपा) को प्रथम राष्ट्रिय महाधिवेशन आजदेखि चितवनको भरतपुरमा सुरु हुँदैछ। पार्टी स्थापनाको चार वर्ष पूरा भएकै दिन आयोजना गरिएको महाधिवेशनलाई रास्वपाले ऐतिहासिक कार्यक्रमका रूपमा प्रस्तुत गरेको छ।

महाधिवेशनको उद्घाटन समारोह भरतपुरस्थित गेस्टहाउस चौरमा अपराह्न आयोजना हुने कार्यक्रम छ। उद्घाटन सत्रमा पार्टी सभापति रवि लामिछानेले महाधिवेशनको उद्घाटन गर्नेछन्।

रास्वपाले महाधिवेशनका लागि आवश्यक सम्पूर्ण तयारी पूरा भएको जनाएको छ। महाधिवेशनअघि बसेको केन्द्रीय समितिको बैठकले पार्टीको संशोधित विधान मस्यौदा पारित गर्नुका साथै प्रतिनिधिको संख्या पनि टुंगो लगाएको छ।

पार्टीका अनुसार महाधिवेशनमा देश तथा विदेशबाट गरी करिब चार हजार दुई सय प्रतिनिधिको सहभागिता रहनेछ। अधिकांश प्रतिनिधि शनिबार नै भरतपुर पुगिसकेका छन्।

तीन दिनसम्म सञ्चालन हुने महाधिवेशनमा उद्घाटन सत्रपछि बन्दसत्र सुरु हुनेछ। बन्दसत्रमा सभापति रवि लामिछानेले राजनीतिक प्रतिवेदन, महामन्त्री कविन्द्र बुर्लाकोटीले सांगठनिक प्रतिवेदन, कोषाध्यक्ष लिमा अधिकारीले आर्थिक प्रतिवेदन तथा विधान मस्यौदा प्रतिवेदन प्रस्तुत गर्ने कार्यक्रम छ।

विधान मस्यौदा पारित भएपछि महाधिवेशन नयाँ नेतृत्व चयन प्रक्रियामा प्रवेश गर्नेछ। महाधिवेशनबाट पार्टीको आगामी नेतृत्व र संगठनात्मक संरचनाबारे महत्वपूर्ण निर्णय हुने अपेक्षा गरिएको छ।

उद्घाटन समारोहमा सभापति लामिछानेसँगै प्रधानमन्त्री तथा पार्टीका वरिष्ठ नेता बालेन शाहले पनि सम्बोधन गर्ने कार्यक्रम रहेको छ। रास्वपाले संसद्मा प्रतिनिधित्व गर्ने विभिन्न राजनीतिक दलका नेताहरूलाई समेत निमन्त्रणा दिएको छ। कार्यक्रममा अन्य दलका नेताहरूले शुभकामना मन्तव्य दिनेछन्।

महाधिवेशनको माहोलसँगै भरतपुर क्षेत्र रास्वपाका झण्डा, ब्यानर र स्वागत सामग्रीले सजिएको छ। स्थानीयवासीले पनि महाधिवेशनमा सहभागी हुन आएका प्रतिनिधि तथा पाहुनालाई स्वागत गरिरहेका छन्।

रवि लामिछानेले २०७९ असार ७ गते रास्वपाको घोषणा गरेका थिए। पार्टी स्थापना भएको पाँच महिनापछि सम्पन्न प्रतिनिधिसभा निर्वाचनमा रास्वपाले २१ सिट जितेको थियो। त्यसपछि गत फागुन २१ गते सम्पन्न निर्वाचनमा झण्डै दुई तिहाइ सिट जित्दै रास्वपा देशको सबैभन्दा ठूलो दल बनेको थियो।

रास्वपाले स्थापनाको चार वर्ष पूरा भएकै दिन पहिलो राष्ट्रिय महाधिवेशन आयोजना गरेको हो। पार्टी हाल संघीय सरकारको नेतृत्वसमेत गरिरहेको छ। महाधिवेशनलाई रास्वपाको भावी राजनीतिक दिशा, नेतृत्व चयन र संगठन विस्तारसँग जोडेर महत्वका साथ हेरिएको छ।