नारायणगढ–मुग्लिन सडकखण्डअन्तर्गत जलबिरेमा दुई बस र एक ट्रक एकापसमा ठोक्किँदा ३० जना घाइते भएका छन्। घाइतेमध्ये एक जनाको अवस्था गम्भीर रहेको प्रहरीले जनाएको छ।

प्रहरीका अनुसार नारायणगढबाट मुग्लिनतर्फ जाँदै गरेको बसले सोही दिशामा अघि बढिरहेको ट्रकलाई उछिन्ने प्रयास गर्दा विपरीत दिशाबाट आइरहेको अर्को बससँग ठोक्किएको हो। त्यसपछि तीनवटै सवारीसाधन दुर्घटनामा परेका थिए।

दुर्घटनामा घाइते भएका ३० जनामध्ये २१ जनाको उपचार चितवन मेडिकल कलेजमा भइरहेको छ भने अन्य नौ जनाको पुरानो मेडिकल कलेजमा उपचार भइरहेको जिल्ला प्रहरी कार्यालयले जनाएको छ।

दुर्घटनापछि केही समय नारायणगढ–मुग्लिन सडकमा सवारी आवागमन प्रभावित भएको थियो। अवरोध हटाइएपछि सडकमा यातायात सञ्चालन पुनः सामान्य भएको प्रहरीले जनाएको छ।