भूमि व्यवस्था, सहकारी, संघीय मामिला तथा सामान्य प्रशासन मन्त्री प्रतिभा रावलले काठमाडौंबाट स्थानान्तरण गरिएका ३८८ परिवारमध्ये ५१ परिवारको जग्गा भेटिएको दाबी गरेकी छन्। जग्गा भएका परिवार सुकुमबासी नभई हुकुमबासी रहेको पाइएपछि उनीहरूको निवेदन अस्वीकृत गर्दै कारबाही प्रक्रिया अघि बढाइएको उनले बताइन्।
सरकारले काठमाडौंका नदी तथा खोला किनारमा जोखिमपूर्ण रूपमा बसोबास गरिरहेका ३८८ परिवारलाई त्यहाँबाट हटाएर सुरक्षित स्थानमा स्थानान्तरण गरेको थियो। तीमध्ये अधिकांशलाई होल्डिङ सेन्टरमा राखेर व्यवस्थापनको प्रक्रिया अघि बढाइएको छ।
मन्त्री रावलका अनुसार होल्डिङ सेन्टरमा रहेका ३८८ परिवारको लगत संकलन गरी विस्तृत विवरण तयार पारिएको थियो। सोही क्रममा ५८ परिवारको निवेदन सम्बन्धित जिल्ला र स्थानीय तहमा पठाइएको र ५१ परिवारको नाममा जग्गा भेटिएपछि उनीहरूको सुकुमबासी निवेदन अस्वीकृत गरिएको हो।
उनले ५१ परिवारको विवरण यसअघि नै आयोगमा दर्ता रहेको उल्लेख गर्दै उनीहरूका सम्बन्धमा छुट्टै सूचना प्रकाशित गरिने जानकारी दिइन्।
मन्त्री रावलले वास्तविक सुकुमबासी र अव्यवस्थित बसोबासीको समस्या समाधानका लागि सरकार गम्भीरतापूर्वक काम गरिरहेको पनि बताइन्।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
