उपल्लो मुस्ताङमा मङ्गलबार साँझ आएको भीषण लेदोसहितको बाढीले छवटा पुलमा क्षति पुर्याएको छ। जिल्ला प्रहरी कार्यालय मुस्ताङका अनुसार, नेपाल–चीन सीमावर्ती क्षेत्र लोमान्थाङ गाउँपालिका–४ छोसेरस्थित चुम्जुङ खोलामा करिब तीन घण्टा लामो बाढी आएको थियो।
बाढीका कारण लोमान्थाङ–४ को चुम्जुङ खोलामा रहेको एक पक्की मोटरेबल पुल र लोमान्थाङ–२ साम्जुङस्थित निर्माणाधीन अर्को एक पक्की पुलमा क्षति पुगेको छ। त्यस्तै, फलामे पुल एक थान र तीन वटा काठेपुल समेत बगाएर बाढीले पूर्णरूपमा नष्ट पारेको प्रहरीले जनाएको छ।
प्रहरी नायब उपरीक्षक छिरिङ किप्पा लामाका अनुसार, खोलाको बीचमा सञ्चालनमा रहेको एक होटल र न्याम्डो गाउँका दुई घरका बासिन्दाहरूलाई सुरक्षित स्थानमा सारिएको छ। हालसम्म मानवीय वा पशु चौपायामा कुनै क्षति नभएको जानकारी दिइएको छ।
हाल बाढीको बहाव केही कम भएको छ भने सम्भावित जोखिमलाई मध्यनजर गर्दै सुरक्षा व्यवस्था कडा पारिएको छ। इलाका प्रहरी कार्यालय छोसेरबाट प्रहरी सहायक निरीक्षकको टोली र सशस्त्र प्रहरी बल बीओपी नेचुङबाट नौ सदस्यीय टोली खटाइएको छ।
स्थानीयलाई सम्भावित खतराबारे सतर्क गराइएको छ। जिल्ला प्रहरी कार्यालयले अझै पूर्ण रुपमा जोखिम नटरेको भन्दै सावधानी अपनाउन आग्रह गरेको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
