सङ्घीय संसद् प्रतिनिधिसभाको बैठक आज (शुक्रबार) दिउँसो १ बजे नयाँ बानेश्वरस्थित संसद् भवनमा बस्दैछ। बैठकमा शिक्षा, विज्ञान तथा प्रविधिमन्त्री रघुजी पन्तले ‘राष्ट्रियसभामा उत्पत्ति भएको तिलगङ्गा नेत्र विश्वविद्यालय विधेयक, २०८१’ माथि विचार गरियोस् भन्ने प्रस्ताव पेश गर्नुहुने कार्यसूची रहेको छ।

उक्त विधेयक २०८१ असार ४ गते राष्ट्रियसभामा दर्ता भएको थियो भने २०८१ चैत ४ गते राष्ट्रियसभाले पारित गरिसकेको छ। अब प्रतिनिधिसभाले उक्त विधेयकमाथि छलफल गरी पारित गर्ने प्रक्रिया अघि बढ्नेछ।

विधेयकमा आँखा स्वास्थ्य शिक्षाको क्षेत्रमा अध्ययन, अध्यापन तथा अनुसन्धानलाई प्रवर्धन गर्ने, विशेषज्ञ सेवा प्रदान गर्ने, नवीनतम प्रविधिको विकास र विस्तारमार्फत आँखा स्वास्थ्यमा उत्कृष्ट प्राज्ञिक केन्द्रको रूपमा तिलगङ्गा नेत्र विश्वविद्यालय स्थापना गर्ने व्यवस्था प्रस्ताव गरिएको छ।

सरकारले नेपालमा बढ्दो आँखासम्बन्धी स्वास्थ्य चुनौतीलाई सम्बोधन गर्न उच्चस्तरीय जनशक्ति उत्पादन र स्वास्थ्य सेवा विस्तार गर्नका लागि सो विश्वविद्यालय स्थापना गर्न विधेयक अघि सारेको हो