संघीय संसदअन्तर्गत प्रतिनिधिसभाको बैठक आज अपराह्न १ बजेका लागि बोलाइएको छ। नयाँ बानेश्वरस्थित संघीय संसद भवनमा बस्ने बैठकको कार्यसूचीमा महत्त्वपूर्ण विधेयकहरू प्रस्तुत हुनेछन्।
बैठकमा उद्योग, वाणिज्य तथा आपूर्तिमन्त्री दामोदर भण्डारीले ‘औद्योगिक सम्पत्तिसम्बन्धी विधेयक, २०८२’ माथि विचार गरियोस् भन्ने प्रस्ताव पेश गर्नुहुनेछ। यस विधेयकले नेपालको औद्योगिक सम्पत्ति संरक्षण र व्यवस्थापनलाई कानुनी आधार दिने अपेक्षा गरिएको छ।
त्यसैगरी, उपप्रधानमन्त्री एवं अर्थमन्त्री विष्णुप्रसाद पौडेलले ‘भन्सार विधेयक, २०८०’ माथि राष्ट्रियसभाबाट भएको संशोधनमाथि विचार गरियोस् भन्ने प्रस्ताव प्रस्तुत गर्नुहुने कार्यसूचीमा उल्लेख छ।
आजै विभिन्न संसदीय समितिहरूको बैठक पनि बस्दैछन्। तीमध्ये:
-
अन्तर्राष्ट्रिय सम्बन्ध र पर्यटन समितिमा ‘लुम्बिनी विकास कोषको वर्तमान अवस्था, प्रगति र चुनौती’ सम्बन्धमा समसामयिक छलफल हुनेछ।
-
कृषि, सहकारी तथा प्राकृतिक स्रोत समितिमा ‘भूमिसम्बन्धी केही नेपाल ऐनलाई संशोधन गर्न बनेको विधेयक, २०८२’ सम्बन्धमा दफावार छलफल हुने कार्यसूची छ।
-
विधायन व्यवस्थापन समितिमा ‘जलस्रोत विधेयक, २०८१’ को मस्यौदा प्रतिवेदनमाथि छलफल हुनेछ।
-
सार्वजनिक नीति तथा प्रत्यायोजित विधायन समितिमा ‘राष्ट्रिय निकुञ्जसँग सम्बन्धित प्रतिवेदन’ माथि छलफल गर्ने कार्यक्रम तय गरिएको छ।
