भारतका चर्चित हास्य कलाकार कपिल शर्माको क्यानडाको सरे सहरस्थित क्याप्स क्याफेमा पुनः गोली प्रहार भएको छ। घटनाको जिम्मेवारी कुख्यात ‘गोल्डी ढिल्लन’ समूहले लिएको छ। यो क्याफेमा भएको यो दोस्रो आक्रमण हो, जसले कलाकारको सुरक्षाबारे गम्भीर प्रश्न उठाएको छ।
सामाजिक सञ्जालमा सार्वजनिक भएको भिडिओमा केही व्यक्तिहरू कारभित्रैबाट क्याफेतर्फ गोली हानिरहेको देखिन्छ। घटनामा हालसम्म कुनै मानवीय क्षति भएको जानकारी आएको छैन भने स्थानीय प्रहरीले घटनाको अनुसन्धान सुरु गरिसकेको छ।
गोल्डी ढिल्लनले सामाजिक सञ्जालमार्फत पोस्ट गर्दै आफू र लरेन्स बिश्नोई गिरोहले यस आक्रमणको जिम्मेवारी लिएको बताएका छन्। “सबै दाजुभाइलाई राम राम… गोल्डी ढिल्लन र लरेन्स बिश्नोई गिरोहले आज सरेको कपिल शर्माको क्याप्स क्याफेमा भएको गोलीबारीको जिम्मेवारी लिन्छ,” पोस्टमा उल्लेख गरिएको छ।
यसअघि पनि जुलाई १० मा सोही क्याफेमाथि गोली प्रहार भएको थियो, जसको जिम्मेवारी खालिस्तानी आतंककारी हरजित सिंह लड्डीले लिएका थिए। उनले कपिल शर्माको पुरानो अभिव्यक्तिलाई लिएर आक्रमण गरिएको बताएका थिए। लड्डी भारतको राष्ट्रिय अनुसन्धान निकाय (NIA) को मोस्ट वान्टेड सूचीमा परेका एक आतंककारी हुन् र बब्बर खालसा इन्टरनेसनल (BKI) सँग सम्बन्धित मानिन्छन्।
हालसम्म कपिल शर्माले घटनाबारे कुनै सार्वजनिक प्रतिक्रिया दिएका छैनन्। तर सरे प्रहरी विभागले घटनालाई गम्भीर रूपमा लिँदै सुरक्षा कडाइ गरिएको जनाएको छ। कलाकारहरूमाथि यस्ता श्रृंखलाबद्ध आक्रमणले प्रवासी भारतीय समुदायमा पनि डर र चिन्ता थपिएको छ।
प्रतिक्रिया
सम्बन्धित खवर
