श्रीकृष्णजन्माष्टमी’ पर्व आज देशभर भगवान् श्रीकृष्णको पूजा–आराधना गरी मनाइँदैछ।
ज्ञानयोग, कर्मयोग र भक्तियोगका प्रणेता भगवान् श्रीकृष्णको जन्म द्वापरयुगमा भाद्रकृष्ण अष्टमीको मध्यरातमा भएकाले आजको दिनलाई ‘श्रीकृष्णजन्माष्टमी’ र रातलाई ‘मोहरात्री’ भनिन्छ। यस दिन देशभरिका कृष्णमन्दिरमा पूजा–आराधना, प्रवचन, भजनकीर्तनसँगै विशेषगरी महिला–पुरुष व्रत बस्ने र रातभर जाग्राम बस्ने परम्परा रहेको छ।
अन्याय, अत्याचार र राक्षसी प्रवृत्तिबाट मानवको रक्षा गर्न भगवान् विष्णुको आठौँ अवतारका रूपमा जन्मनुभएका श्रीकृष्णले आजीवन सत्यको पक्षमा रहेर मानवलाई सत्कर्मतर्फ प्रेरित गर्नुभएको थियो। कुरुक्षेत्र युद्धका क्रममा अर्जुनलाई दिनुभएको उपदेश नै ‘श्रीमद्भागवत गीता’को रूपमा प्रसिद्ध छ, जसलाई विश्वमै सबैभन्दा बढी भाषामा अनुवाद भएको ग्रन्थ मानिन्छ।
पौराणिक कथाअनुसार बाल्यकालदेखि नै आफ्ना लीला देखाउनुभएका श्रीकृष्णले कंश, जरासन्ध र शिशुपालजस्ता दानवी प्रवृत्तिको संहार गर्नुभएको उल्लेख पाइन्छ। यस अवसरमा आज पाटनको मङ्गलबजारस्थित प्रसिद्ध कृष्णमन्दिरमा मेला लागेको छ। राजधानीको कागेश्वरी मनोहरा नगरपालिकास्थित नवतनधाम र बूढानीलकण्ठस्थित अन्तरराष्ट्रिय श्रीकृष्ण भावनामृत सङ्घ (इस्कोन)को कृष्णमन्दिरमा समेत भक्तजनको भीड लागेको छ।
यसैगरी राजधानीका विभिन्न कृष्णमन्दिरमा भक्तजनको भीड लाग्ने र धार्मिक सङ्घसंस्थाद्वारा झाँकीसहित शोभायात्रा तथा रथयात्रा निकाल्ने परम्परा रहेको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
