पशुपति क्षेत्र विकास कोषले यस वर्षको हरितालिका (तीज) पर्वलाई लक्षित गर्दै भक्तजनका लागि विशेष व्यवस्था मिलाएको छ।
कोषले व्रतालु महिलाहरूलाई सहज दर्शन गराउन मन्दिरको बाहिरी क्षेत्रमा चार लाइन र भित्री क्षेत्रमा आठ लाइन तोकिएको जनाएको छ। सोमबारदेखि सुरु हुने तीज पर्वमा भक्तजनले एकदेखि डेढ घण्टाभित्र दर्शन गर्न सक्ने गरी व्यवस्था मिलाइएको कोषका निमित्त सदस्यसचिव सुभाषचन्द्र जोशीले पत्रकार सम्मेलनमार्फत जानकारी दिए।
उनका अनुसार तीजमा बाहिरी क्षेत्रमा मात्र स्वयंसेवक खटाइने छन्। साथै, भक्तजनलाई चर्को घाममा लामो समय लाइनमा बस्नुपर्ने अवस्थाबाट जोगाउन विशेष तयारी गरिएको हो।
कोषका कोषाध्यक्ष नारायणप्रसाद सुवेदीले मन्दिरका चारै ढोका बिहान ३ बजेदेखि नै खोलिने जानकारी दिए। साथै, पत्रकारहरूलाई समाचार सङ्कलनका लागि सूचना विभाग वा सम्बन्धित सञ्चारगृहको परिचयपत्रका आधारमा मुख्य क्षेत्रसम्म जान दिइने व्यवस्था मिलाइएको संस्कृति संरक्षण महाशाखाका निमित्त प्रमुख अरुणकुमार श्रेष्ठले बताए।
कोषका सूचना अधिकारी अनिता भट्टका अनुसार यस वर्षको तीज पर्वमा सुरक्षा व्यवस्था, स्वयंसेवक परिचालन, ट्राफिक र पार्किङ, स्वास्थ्य सेवा, सरसफाइ तथा जुत्ता–चप्पल कक्षको समेत विशेष व्यवस्था गरिएको छ।
यस वर्ष तीज सोमबार दर खाने दिनसँगै सुरु हुँदैछ। मंगलबार व्रतालु महिलाले निराहार व्रत बसेर भगवान् शिवको पूजाआराधना गर्नेछन्। बुधबार गणेश चौथी र अन्तिम दिन बिहीबार सप्तऋषि तथा अरुन्धती पूजासहित तीज पर्व समापन हुनेछ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
