नेपाल ‘ए’ क्रिकेट टोलीले भारतको आसाम प्रदेशविरुद्धको टी–२० अभ्यास सिरिज उपाधि जित्न सफल भएको छ। सोमबार गुवाहटीमा सम्पन्न पाँचौँ तथा निर्णायक खेलमा नेपालले घरेलु टोलीलाई ४४ रनले पराजित गर्दै सिरिज ३–२ ले आफ्नो पक्षमा पार्यो।
पहिले ब्याटिङ गरेको नेपालले निर्धारित २० ओभरमा पाँच विकेट गुमाउँदै २०८ रनको विशाल योगफल खडा गरेको थियो। नेपालका लागि सन्दीप जोराले शानदार ६४ रन बनाउँदै उच्च योगदान दिए भने शुभ कंसाकारले ४१ र इशान पाण्डेले ३२ रन जोडे। बलिङतर्फ आसामका आयुष्मान मलाकार र अभिनव चौधरीले समान दुई–दुई विकेट लिए।
जवाफमा २०९ रनको लक्ष्य पछ्याएको आसाम २० ओभरमा नौ विकेट गुमाउँदै १६४ रनमै रोकियो। आसामका भार्गव लहकरले सर्वाधिक अविजित २९ रन बनाए भने कप्तान सुमित घडिअन्कर र साहिल जेनले समान २५–२५ रन योगदान दिए। नेपालका शेर मल्ल, आकाश चन्द र पवन सर्राफले समान दुई–दुई विकेट हात पारे भने बसिर अहमदले एक विकेट लिए।
यसअघि सिरिजको पहिलो र दोस्रो खेल नेपालले क्रमशः १५ र ९६ रनले जितेको थियो। तर तेस्रो खेलमा नौ रन र चौथो खेलमा १८ रनले पराजित भएपछि सिरिज २–२ बराबरीमा पुगेको थियो। अन्तिम खेलमा उत्कृष्ट प्रदर्शन गर्दै नेपालले उपाधि आफ्नो बनाएको हो।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
