रुपन्देही क्षेत्र नम्बर–३ को आगामी उपनिर्वाचनमा राष्ट्रिय स्वतन्त्र पार्टी (रास्वपा)बाट उम्मेदवार बनेका डा. लेखजंग थापाले आफ्नो वैवाहिक सम्बन्धबारे सार्वजनिक प्रश्न उठेपछि स्पष्टीकरण दिएका छन्।
थापाले मंगलबार बिहान सामाजिक सञ्जालमार्फत रुपन्देही जिल्ला अदालतको फैसला कागज प्रस्तुत गर्दै एक पत्नीसँग सम्बन्ध विच्छेद भइसकेको प्रमाण सार्वजनिक गरेका हुन्। अदालतको आदेशअनुसार २०७९ माघ १५ गते न्यायाधीश उमेश कोइरालाको इजलासले थापा र उनकी एक पत्नीबीच सम्बन्ध विच्छेद गरेको देखिन्छ।
व्यक्तिगत जीवनबारे खुलासा
“परिस्थितिका कारण मैले जीवनमा दुई पटक बिहे गरेको कुरा सत्य हो। त्यति नै सत्य मेरो एक श्रीमतीसँगको सम्बन्ध विच्छेद पनि हो,” थापाले लेखेका छन्। उनले सम्बन्ध विच्छेद भएकी श्रीमतीसँग आफ्नो सन्तान रहेको उल्लेख गर्दै आफू पिता भएको कुरामा गर्व व्यक्त गरेका छन्।
आमाबारे भावुक भनाइ
थापाले स्टाटसमा आमा प्रति भावुक सन्देश पनि लेखेका छन्। उनले भने, “रुपन्देही–३ मा ९६ वर्षकी मेरी बुढी आमा बस्नुहुन्छ। पहिलो फ्लाइट लिएर आमालाई उम्मेदवार भएको खुसी सुनाउने र आशीर्वाद लिने मन थियो। सोचेको थिएँ– चिकित्सकका रूपमा गरेका सत्कर्मका कुरा हेडलाइन बन्छन् होला। तर, खैर, जिन्दगी सोचे जस्तै कहाँ हुन्छ र!”
उनले थपे, “म आमालाई भेट्न भैरहवामा पुग्नुपर्ने बेला काठमाडौंमा मेरो निजी जीवनबारे उठेका प्रश्नहरूको जवाफ दिइरहेको छु।”
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
