अमेरिकी राष्ट्रपति डोनाल्ड ट्रम्पले नेटो राष्ट्रहरूलाई रूसमाथि कडा प्रतिबन्धको तयारी भए पनि त्यसका लागि कडा शर्त राखेका छन्। उनले सबै नेटो सदस्य राष्ट्रहरूले एकमत भएर रूसबाट तेल खरिद पूर्ण रूपमा बन्द गरे मात्रै नयाँ प्रतिबन्ध लागू हुने बताएका हुन्।

ट्रम्पले नेटो सदस्यहरूको प्रतिबद्धता कमजोर भएको आरोप लगाउँदै “१००% भन्दा कम प्रतिबद्धताले संगठनलाई कमजोर बनाएको” टिप्पणी गरेका छन्। उनले केही राष्ट्रहरूले अझै रूसको तेलमा निर्भर रहनुले समझौताको प्रभाव घटाएको दाबी गरे।

त्यससँगै उनले चीनमाथि ५० देखि १०० प्रतिशतसम्मको ट्यारिफ लगाउनुपर्ने सुझाव पनि दिएका छन्। ट्रम्पका अनुसार युद्ध अन्त्य भएपछि मात्र सो शुल्क हटाइनेछ।

राष्ट्रपति ट्रम्पले जारी युद्धको जिम्मेवारी अमेरिकी राष्ट्रपति जो बाइडेन र युक्रेनी राष्ट्रपति भोलोदिमिर जेलेन्स्कीमाथि हाल्दै भने, “यो मेरो युद्ध होइन। म त केवल युद्ध रोक्न र हजारौँ जीवन जोगाउन आएको हुँ।”

उनले नेटोलाई तत्काल निर्णय लिन आग्रह गर्दै चेतावनी दिएका छन् कि आफ्ना सल्लाहहरू बेवास्ता भएमा अमेरिकी समय, ऊर्जा र स्रोत अनावश्यक रूपमा खर्चिनेछ। ट्रम्पको यो कदमले नेटोभित्र फेरि असहमति र छलफललाई तीव्र पार्ने देखिएको छ।