विसं २०८१ असोजमा परेको विपद्का क्रममा आवास गुमाएका जिल्लाका पीडितहरूका लागि सरकारले अस्थायी आवास अनुदान वितरण कार्य अघि बढाएको छ। जिल्लाका १३ स्थानीय तहका तीन हजार १२८ परिवारलाई पहिलो किस्तामा रु ७ करोड ७९ लाख २५ हजार उपलब्ध गराइएको छ।
सरकारले पहिलो किस्तामा प्रतिघर परिवार रु २५ हजार र दोस्रो किस्तामा रु २५ हजार गरी कुल रु ५० हजार अनुदान वितरण गर्ने व्यवस्था मिलाएको थियो। हालसम्म बेथानचोक र रोशी गाउँपालिकाले मात्र दोस्रो किस्ताको रकम वितरण गरी पीडित परिवारसम्म पुर्याएका छन्।
पहिलो किस्तामा अनुदान पाउने प्रमुख स्थानीय तहहरूमा धुलिखेल, बनेपा, पनौती, पाँचखाल, मण्डनदेउपुर, नमोबुद्ध, चौँरीदेउराली, खानीखोला, रोशी, भुम्लु, तेमाल र बेथानचोक पर्दछन्।
विपद्का एक वर्ष बितिसक्दा पनि निजी आवासको विस्तृत क्षति आकलन अझै पूर्ण भएको छैन। गत वर्षको अविरल वर्षापछि आएको बाढीपहिरोले काभ्रेपलाञ्चोकमा ८१ जनाको ज्यान लिएको थियो भने करिब एक सय व्यक्ति घाइते भएका थिए।
सरकारले स्थायी घर निर्माणका लागि विस्तृत क्षति आकलन पूरा गर्ने र क्रमशः अनुदान उपलब्ध गराउने तयारी गरिरहेको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
