अर्थ मन्त्रालयले स्रोत नखुलेको रकम विभिन्न व्यक्तिले निवास वा अन्य स्थानमा लुकाइराखेको भन्ने विषयमा अनुसन्धान भइरहेको जनाएको छ। मन्त्रालयले सोमबार जारी गरेको सूचनामा सम्पत्ति शुद्धीकरण (मनी लाउन्डरिङ) निवारण ऐन, २०६४ बमोजिम अनुसन्धान अघि बढाइएको उल्लेख गरेको हो।
जेनजेड आन्दोलनका क्रममा आगजनी हुँदा कतिपय घरमा ठूलो परिमाणको नगद जलेको वा भेटिएको समाचार सार्वजनिक भएपछि मन्त्रालयले यस्तो सूचना जारी गरेको हो। मन्त्रालयले आय आर्जन भएको र स्रोत खुलेको स्वदेशी रकम जुनसुकै परिमाणमा सुरक्षित राख्न र उपयोग गर्न कानुनी रोकावट नभएको स्पष्ट पारेको छ।
तर, जोखिम कम गर्नका लागि नागरिकलाई नगदको सट्टा विद्युतीय भुक्तानी प्रणाली प्रयोग गर्न आग्रह गरिएको छ। सरकारले सेवा वा वस्तुको खरिदबिक्री तथा अन्य कारोबार वित्तीय संस्था वा बैंकिङ उपकरणमार्फत गर्ने प्रोत्साहन दिइरहेको भन्दै विद्युतीय कारोबार सुरक्षित र सजिलो हुने मन्त्रालयको भनाइ छ।
सूचनामा ठूला कारोबार अनिवार्य रूपमा बैंकिङ प्रणालीमार्फत गर्नुपर्ने कानुनी व्यवस्था स्मरण गराइएको छ। कुनै पनि व्यक्ति, फर्म वा संस्थाले १० लाख रुपैयाँ वा सोभन्दा बढीको कारोबार गर्दा अनिवार्य रूपमा बैंकिङ उपकरण प्रयोग गर्नुपर्ने व्यवस्था छ।
विदेशी मुद्राको हकमा नेपाल भित्र्याउने सीमाबारे पनि मन्त्रालयले प्रष्ट्याएको छ। भन्सार घोषणाबिनै अमेरिकी डलर पाँच हजारसम्म ल्याउन सकिने तर सोभन्दा बढी रकम घोषणा गरी प्रमाणित गर्नुपर्ने व्यवस्था छ। त्यस्तै, नेपाली नागरिकले वैध तरिकाले आर्जन गरेको अधिकतम १,५०० अमेरिकी डलरसम्मको विदेशी मुद्रा नगदमा राख्न सक्ने प्रावधान रहेको मन्त्रालयले स्मरण गराएको छ।
स्रोत नखुलेको नगद भेटिएमा प्रचलित कानुनबमोजिम अनुसन्धान र कारबाही गर्ने गरी सम्बन्धित निकायलाई सक्रिय पारिएको मन्त्रालयले जनाएको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
