अमेरिकी र्यापर, गायक तथा संगीत निर्माता सन “डिडी” कोम्ब्सलाई अमेरिकी अदालतले वेश्यावृत्तिसँग सम्बन्धित दुई आरोपमा दोषी ठहर गर्दै ५० महिनाको कारागार सजाय सुनाएको छ। अदालतले उनलाई यौन कार्यका लागि व्यक्तिहरूलाई एक राज्यबाट अर्को राज्यमा लैजाने अपराधमा दोषी ठहर गरेको हो।
तर, निर्णायक मण्डलले उनलाई सेक्स ट्राफिकिङ अर्थात् मानव बेचबिखनसम्बन्धी गम्भीर आरोपहरूबाट भने निर्दोष ठहर गरेको छ। उनी गत वर्ष सेप्टेम्बरदेखि नै हिरासतमा रहेका कारण अब उनले करिब तीन वर्ष मात्रै जेलमा बस्नुपर्नेछ।
सजाय सुनिएलगत्तै डिडीले आफ्ना पुराना मित्र तथा पूर्व अमेरिकी राष्ट्रपति डोनाल्ड ट्रम्पलाई क्षमायाचना माग्दै माफीका लागि गुहार गरेको अमेरिकी सञ्चारमाध्यमहरूले जनाएका छन्।
ट्रम्पले पत्रकारहरूसँग कुरा गर्दै भने, “म उनलाई पफ ड्याडी भनेर चिन्छु। उनले मलाई माफीका लागि अनुरोध गरेका छन्।” उनले भनेका छन्, “डिडीसँग मेरो पछिल्ला वर्षहरूमा कुनै प्रत्यक्ष सम्पर्क छैन। माफीको विषयमा म केवल तथ्यका आधारमा विचार गर्नेछु।”
अमेरिकी कानून अनुसार, राष्ट्रपति पार्डन (माफी) दिने एकमात्र अधिकारयुक्त पदाधिकारी हुन्। यस अधिकार अन्तर्गत राष्ट्रपति कुनै संघीय अपराधमा दोषी ठहर व्यक्तिको सजाय पूर्ण रूपमा माफ गर्न वा कम गर्न सक्छन्।
यो शक्ति न्याय र दया देखाउने उपायका रूपमा प्रयोग गरिन्छ, तर कतिपय अवस्थामा राष्ट्रपतिले आफ्ना नजिकका सहयोगी वा साथीहरूलाई फाइदा पुर्याउन प्रयोग गरे विवाद चर्किने गर्छ।
डिडीले ट्रम्पसँग माफीको अनुरोध गरेपछि अमेरिकामा फेरि एकपटक राष्ट्रपति पार्डनको प्रयोग र दुरुपयोगबारे बहस सुरु भएको छ।
