अन्नपूर्ण गाउँपालिका–४ मा अवस्थित फुतफुते झरना पछिल्ला वर्षहरूमा म्याग्दीको चर्चित पर्यटकीय गन्तव्य बनेको छ । अग्ला पहाडबीचबाट पहाड नै चिरेर निस्किएको जस्तो देखिने यो झरनाले जो–कोहीलाई मन्त्रमुग्ध बनाउँछ ।
अन्नपूर्ण र निलगिरि हिमालको गोदबाट बग्ने मिस्त्री खोलाले बनाएको साँघुरो खोच र फेदीमा फैलिएको नीलो तालले फुतफुते झरनालाई अझै आकर्षक बनाएको छ । ‘मौरिस हर्जोग’ पदमार्गको प्रवेशद्वारमै पर्ने झरनाले अहिले दैनिक सयौँ पर्यटक तान्न थालेको छ ।
काठमाडौँका घुम्न आएका सुझाव आचार्य भन्छन्, “फुतफुते झरना हेर्दा लाग्छ, पानी होइन, पहाडको मुटु फुटेर बगेको छ।” उनका अनुसार यो झरनाको दृश्यले थकान मात्र मेटाउँदैन, आत्मा नै ताजा बनाउँछ ।
करिब ५० मिटर उचाइबाट खस्ने यो झरनाको फेदीमा नीलो पानीको गोलो ताल बनेको छ । त्यहाँ पुगेका पदयात्री र आन्तरिक पर्यटकले तस्बिर, भिडियो खिच्दै घण्टौँ रमाउने गर्छन् । झरनाको वरिपरि बनाइएको झोलुङ्गे पुलले दृश्य अवलोकनलाई झन् रोमाञ्चक बनाएको छ ।
‘मौरिस हर्जोग पदमार्ग’ का अभियन्ता तेज गुरुङका अनुसार सामाजिक सञ्जालमा फुतफुते झरनाका तस्बिर र भिडियो भाइरल भएपछि दैनिक तीन सयभन्दा बढी पर्यटक आउने गरेका छन् । “पहिले सुनसान हुने झरनामा अहिले दिनभर भीड लाग्छ,” उनले भने ।
अन्नपूर्ण गाउँपालिकाले त्यहाँ आश्रयस्थल र सार्वजनिक शौचालय निर्माण गरी थप पूर्वाधार विकासका योजना अघि बढाएको अध्यक्ष भारतकुमार पुनले बताए । गण्डकी प्रदेशसभा सदस्य हरिबहादुर भण्डारीले पनि झरना र पदमार्गको स्तरोन्नतिका लागि पहल गर्ने प्रतिवद्धता जनाएका छन् ।
फुतफुते झरना पुग्न नारच्याङदेखि दुई घण्टा गाडी र हुमखोलादेखि करिब डेढ घण्टा पैदल यात्रा गर्नुपर्छ । त्यहाँ पुग्ने धेरैजसो पर्यटक झरना हेरेर फर्किन्छन् भने साहसी पदयात्री भने अन्नपूर्ण आधार शिविरसम्म यात्रा बढाउँछन् ।
फुतफुते झरना, जहाँ पानीले पहाडलाई चिरेर निस्कन्छ र यात्रुहरू प्रकृतिको सुन्दरतालाई आफ्ना आँखाबाट होइन, मनबाट महसुस गर्छन् ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
