युवा तथा खेलकुद मन्त्रालयले अब आफ्ना सम्पूर्ण आर्थिक कारोबारलाई विद्युतीय माध्यमबाट गर्ने तयारी गरेको छ। मन्त्रालयका अनुसार एक महिनाभित्रै मन्त्रालय र मातहतका निकाय तथा खेल संघहरूको सम्पूर्ण कारोबार अनलाइन प्रणालीमार्फत सञ्चालन गरिनेछ।
मन्त्री बब्लु गुप्ताको नेतृत्वमा मन्त्रालयले तत्काल सुधार कार्ययोजना २०८२ लागू गर्दै सुधारका काम तीव्र रूपमा अघि बढाएको छ। उक्त योजनाअनुसार आर्थिक कारोबारमा पारदर्शिता र दक्षता ल्याउन डिजिटल प्रणालीको प्रयोग अनिवार्य बनाइनेछ।
युवा तथा खेलकुद मन्त्रालयले २० दिनभित्र स्थानीयदेखि राष्ट्रिय स्तरसम्मका खेलाडीहरूको व्यक्तिगत तथा खेलकुदसम्बन्धी अभिलेख तयार गर्ने तयारी पनि गरेको छ। यसले खेल क्षेत्रमा नीति निर्माण र पुरस्कार वितरणमा सहजता ल्याउने अपेक्षा गरिएको छ।
त्यससँगै मन्त्रालय र सम्बद्ध निकायका बैठकहरू अब सञ्चारमाध्यममार्फत प्रत्यक्ष प्रसारण गर्न थालिएको छ। मन्त्री गुप्ताले यो कदमले मन्त्रालयको कामकाज पारदर्शी र जनउत्तरदायी बनाउने विश्वास व्यक्त गरे।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
