फिलिपिन्समा आइपरेको कालमेगी नामक भीषण आँधीले ठूलो जनधनको क्षति पुर्याएको छ। हालसम्म कम्तीमा ५२ जनाको ज्यान गएको छ भने १३ जना अझै बेपत्ता छन्। आँधीका कारण लाखौं नागरिकले आफ्नो घरबार छाड्न बाध्य भएका छन्।
स्थानीय अधिकारीका अनुसार देशका धेरै क्षेत्रमा भीषण बाढी आएको छ। विशेषगरी जनघनत्व धेरै रहेको मध्य द्वीप सेबु सबैभन्दा बढी प्रभावित भएको छ। बीबीसीका अनुसार सेबुमा सबैभन्दा धेरैको मृत्यु भएको र सयौं घर पूर्णरूपमा क्षतिग्रस्त भएका छन्।
सामाजिक सञ्जालमा सार्वजनिक भएका भिडियोहरूमा मानिसहरू घरका छानामा शरण लिइरहेको र सवारीसाधनहरू बाढीले बगाइरहेको दृश्य देखिन्छ। बाढीले सडक तथा बिजुली संरचना पनि नष्ट गरेको जनाइएको छ।
सेनाले उद्धारका लागि पठाएको हेलिकप्टर मिन्डानाओ द्वीपमा दुर्घटनाग्रस्त हुँदा चालक दलका ६ सदस्यको मृत्यु भएको छ। ती मृतकहरूलाई आधिकारिक मृतक सूचीमा समावेश गरिएको छैन।
फिलिपिन्समा हरेक वर्ष औसत २० वटा आँधी आउने गर्छन्। केही हप्ता अघि मात्र अर्को आँधीले पनि ठूलो क्षति पुर्याएको थियो। कालमेगी पछिल्लो वर्षकै सबैभन्दा विनाशकारी आँधीको रूपमा चिनिएको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
