पूर्वपश्चिम राजमार्गअन्तर्गत नारायणघाट–बुटवल सडकखण्डको गैँडाकोट क्षेत्रमा अहिले सडक विस्तारको मुख्य काम रातिको समयमा मात्रै भइरहेको छ। नारायणी नदी पुलदेखि पश्चिमतर्फ करिब १७० मिटर सडक कालोपत्र गर्न बाँकी रहेकाले रातिको न्यून ट्राफिकलाई लक्ष्य गरी काम तीव्र बनाइएको हो।
नारायणघाट–बुटवल सडक आयोजना पूर्वी खण्डका सूचना अधिकारी इञ्जिनियर शिव खनालका अनुसार हरेक राति १० बजेदेखि बिहान ४ बजेसम्म निरन्तर काम भइरहेको छ। “दिउँसो सवारीसाधनको चाप धेरै हुँदा काम अघि बढाउन गाह्रो भएको थियो, त्यसैले राति काम गर्दा अधिक सहज भइरहेको छ,” उनले बताए।
दिनमा काम गर्दा लामो जाम र ट्राफिक व्यवस्थापनमा समस्या बढेपछि रातिकलागि कार्ययोजना परिवर्तन गरिएको हो। आयोजना टोलीले तालिका अनुरूप प्रगति भए १० दिनभित्र बाँकी सबै कालोपत्र सकिने विश्वास व्यक्त गरेको छ।
गैँडाकोट र दाउन्ने पहाडबाहेक पूर्वी खण्डको अधिकांश भागमा एकतर्फी कालोपत्र पूरा भइसकेको कार्यालयले जनाएको छ। चाडपर्व सकिएपछि निर्माण गति अझै बढेको इञ्जिनियर खनालले बताए। उनका अनुसार दाउन्ने क्षेत्रमा तीन किलोमिटर सडकमा कालोपत्र भइरहेको छ भने करिब १० किलोमिटरमा ढलानको काम भइरहेको छ। दुईतर्फी कालोपत्र सकिएका भूभागमा अहिले डिभाइडर, सर्भिस लेन र अन्य सौन्दर्यकरणका काम अघि बढिरहेका छन्।
यो सडक विस्तार परियोजनाको कुल भौतिक प्रगति करिब ७० प्रतिशत पुगेको छ। ११४ किलोमिटर लामो नारायणघाट–बुटवल खण्डको पूर्वी भाग ६५ किलोमिटर र पश्चिम भाग ४९ किलोमिटर रहेको छ। विस्तार योजनाअनुसार १०० किलोमिटर सडक चार लेनमा रुपान्तरण हुँदैछ भने दाउन्ने क्षेत्रको १४ किलोमिटर भूगोलिक चुनौतीका कारण तीन लेनमै रहनेछ। सहरी क्षेत्रमा उत्तर र दक्षिण दुवैतर्फ थप दुई लेन ‘सर्भिस लेन’को रूपमा निर्माण गरिँदै छन्।
