नेपाल टेलिकमले आ.व. २०७९/८० सम्मका बक्यौता महसुल तिर्न बाँकी रहेका ग्राहकलाई जरिवाना छुटसहित रकम भुक्तानी गर्न आग्रह गरेको छ। कम्पनीले मंसिर १ देखि माघ मसान्त २०८२ भित्र बक्यौता तिरेमा लाग्ने सम्पूर्ण जरिवाना हटाइने घोषणा गरेको हो।
टेलिकमले सेवा लिएर पनि महसुल नतिरेका ग्राहकलाई नजिककै दूरसञ्चार कार्यालयमा गई यो छुट सुविधा उपयोग गर्न अनुरोध गर्दै चेतावनी समेत दिएको छ।
कम्पनीका अनुसार तोकिएको समयावधिभित्र पनि बक्यौता नतिरेमा सम्बन्धित ग्राहकको नाम राष्ट्रिय दैनिक पत्रिकामा प्रकाशित गरिनेछ। साथै, नेपाल टेलिकमको वेबसाइटमा कालोसूचीमा राख्ने प्रक्रिया पनि सुरु गरिने बताइएको छ।
टेलिकमले बक्यौता व्यवस्थापन कडाइका साथ अघि बढाउँदै उपभोक्तालाई समयमै भुक्तानी गर्न पुनः आग्रह गरेको छ।
