राजावादी अभियन्ता तथा विवादित व्यवसायी दुर्गा प्रसाईंको पक्राउसँगै उनको नजिकको संगठन नागरिक बचाउ दलले तत्कालै सडक संघर्ष सुरु गर्ने घोषणा गरेको छ। सोमबार राति भक्तपुरको ठिमीस्थित घरबाट पक्राउ परेका प्रसाईंलाई प्रहरीले शान्ति–सुरक्षामा खलल पुग्ने अभिव्यक्ति दिँदै आएको आरोपमा नियन्त्रणमा लिएको हो।
प्रसाईंलाई पक्राउ गरिएको विरोधमा आजैदेखि देशव्यापी आन्दोलन थाल्ने नागरिक बचाउ दलले बताएको छ। दलका महामन्त्री प्रेमकुमार थाम्सुहाङले ‘सरकारले अपहरण शैलीमा नेता प्रसाईंलाई उठाएको’ आरोप लगाउँदै अब आन्दोलन मंसिर ७ सम्म पर्खिन नसक्ने बताए।
प्रसाईंलाई पक्राउ गरेसँगै काठमाडौं प्रहरीले उनलाई भद्रकालीस्थित जिल्ला प्रहरी परिसरमा राखेको छ। केही दिनअघि मात्र पत्रकार सम्मेलनमार्फत उनले मंसिर ७ गते काठमाडौं केन्द्रित ‘देशै ठप्प पार्ने’ आन्दोलन गर्ने घोषणा गरेका थिए।
नागरिक बचाउ दलका नेताहरूले आजैदेखि नै काठमाडौंसहित देशभर प्रदर्शन सुरु गर्ने तयारी रहेको बताएका छन्। उनीहरूको भनाइमा, ‘प्रसाईंको गिरफ्तारीले सरकाले नै तनाव बढाउने काम गरेको छ।’
यसअघि पनि प्रसाईंका अभिव्यक्ति र आन्दोलनका तयारीलाई लिएर सुरक्षा निकायले उनीमाथि निगरानी बढाएको थियो।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
