राहदानी विभागले अबदेखि राहदानी वितरणमा लागू भइरहेको कोटा प्रणाली पूर्ण रूपमा हटाएको छ। मन्त्रिपरिषद्ले फ्रान्सेली कम्पनी ईन स्मार्ट आइडेन्टिटी फ्रान्स एसएस सँग सात लाख राहदानी खरिद गर्ने नयाँ सम्झौतामा सहमति प्रदान गरेपछि सेवा सहज बन्दै गएको विभागको भनाइ छ।
सम्झौताअनुसार करिब तीन हप्ताभित्र पहिलो किस्ताको राहदानी नेपाल आइपुग्नेछ। त्यसपछि निरन्तर आपूर्ति प्रक्रिया अघि बढ्दै जाने विभागले जनाएको छ।
राहदानी पुस्तिकाको अभावका कारण विभागले केही दिनदेखि दैनिक एक हजारको कोटा चलाउँदै आएको थियो। तर अब मागअनुसार अनलाइन ‘स्लट’ क्रमशः बढाइने बताइएको छ।
विभागका अनुसार कर्मचारीलाई अतिरिक्त समय खटाइेर सेवाग्रहीलाई यथाशीघ्र राहदानी उपलब्ध गराइनेछ। विदेशस्थित नेपाली नियोगबाट आवेदन दिनेहरूलाई पनि पुरानै व्यवस्थाअनुसार १–२ हप्ताभित्र राहदानी छपाई गरी पठाइने उल्लेख छ।
जिल्ला तथा इलाका प्रशासन कार्यालयमार्फत कात्तिक १५ गतेसम्म आवेदन दिएका व्यक्तिहरूको राहदानी दुई हप्ताभित्र जारी गरिँदैछ। त्यसपछि प्राप्त हुने आवेदनहरूलाई पुरानै क्रमअनुसार प्रसोधन गरिने विभागले जनाएको छ।
विभागका अनुसार राहदानी सेवा अब क्रमशः पूर्ण रूपमा सहज र नियमित बन्दै जानेछ।
