बिरामी बोक्न प्रयोग हुने नेपाल रेडक्रस सोसाइटी रामनगर बहुअर्वाको नाममा दर्ता गरिएको एम्बुलेन्समा लुकाइराखिएको ५१ किलो ५ सय ग्राम गाँजा सर्लाही प्रहरीले बरामद गरेको छ। हरिवन नगरपालिका–५, घुर्कौलीस्थित हिरालाल टोलमा ज १ च १५५८ नम्बरको एम्बुलेन्सको पछाडिपट्टि बोराभित्र राखिएको गाँजा प्रहरीले नियन्त्रणमा लिएको हो।
एम्बुलेन्स चालक ३७ वर्षीय सुरेन्द्र राय यादव रौतहटको यमुनामाई गाउँपालिका–४, सरुअठा बस्ने भएको बताइएको छ। बरामद गाँजाबारे अनुसन्धान भइरहेको प्रहरीले जनाएको छ। जिल्ला प्रहरी कार्यालयका अनुसार सर्लाहीको चुरे क्षेत्रमा व्यवसायिक रूपमा गाँजा खेती हुँदै आएको छ र उत्पादित गाँजा बिक्रीका लागि भारत पठाउने गरिएको छ।
यस अघि मात्रै प्रहरीले लालबन्दी नगरपालिका–११, हीरापुरबाट ५२ किलो गाँजा सहित पिकअप भ्यानसहित एक जनालाई नियन्त्रणमा लिएको थियो। यस घटनाले एम्बुलेन्समार्फत लागुऔषध ओसारपसार भइरहेको खुलासासँगै प्रहरीको नजर इलाकामा थप कडा गरिएको छ।
