काठमाडौँ, मंसिर २४ । सरकार र जेनजी संयुक्त जनआन्दोलनबीच तयार हुँदै आएको सम्भावित सम्झौतापत्र अब अन्तिम रूप दिन नजिक पुगेको छ। प्रधानमन्त्री सुशीला कार्कीको निर्देशनमा दुवै पक्षबीच निरन्तर भइरहेको परामर्शबाट मसौदाको खाका लगभग पूरा भएको सरकारी स्रोतले जनाएको छ।
सरकारका प्रवक्ता तथा सञ्चार मन्त्री जगदीश खरेलले केही शब्दचयन र प्राविधिक बुँदा मात्र परिमार्जन गर्न बाँकी रहेको बताउँदै, सहमतिका मुख्य विषयहरू टुंगिएको जानकारी दिए। मन्त्री खरेलका अनुसार, दुवै पक्षले सहमतिका बुँदामा एकरूपता कायम गरेपछि औपचारिक रूपमा सम्झौता हस्ताक्षर हुनेछ।
यसैबीच, जेनजी आन्दोलनका अभियन्ता सुदन गुरुङले प्रधानमन्त्री कार्कीलाई भेटेर वार्ताको गति र प्रगति प्रति चासो प्रकट गरेका छन्। सिंहदरबारमा भएको भेटमा गुरुङले आन्दोलनमा संलग्न युवामाथि भइरहेको धरपकड, धरौटी नथपेर थुनामा पुग्न बाध्य भएका घटनाबारे प्रधानमन्त्रीलाई जानकारी गराउँदै, सम्झौता प्रक्रिया छिटो निष्कर्षमा पुर्याउन अनुरोध गरेका थिए।
गुरुङले जेनजी आन्दोलनलाई आधिकारिक मान्यता दिने गरी सम्झौता राष्ट्रपतिसमक्ष प्रस्तुत हुनुपर्ने आग्रहसमेत गरेका छन्। सरकार र आन्दोलनबीचको संवाद अन्तिम चरणतर्फ अघि बढेसँगै आन्दोलनकारी युवाहरूका माग र भविष्यको राजनीतिक व्यवस्थापनबारे पनि सकारात्मक वातावरण बनेको देखिन्छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
