राष्ट्रिय स्वतन्त्र पार्टी (रास्वपा) का कार्यवाहक सभापति डीपी अर्यालले सहकारी ठगी मुद्दामा कारागारमा रहेका रवि लामिछानेको विषयमा वर्तमान सरकारको धारणा बुझ्ने प्रयास भइरहेको बताएका छन्।
शुक्रबार रास्वपा कर्णाली प्रदेशद्वारा आयोजना गरिएको राजनीतिक प्रशिक्षण कार्यक्रममा सहभागी भएर पत्रकारसँग कुराकानी गर्दै अर्यालले भने, “हिजो पेसी स्थगित भएको छ। हाम्रो कानूनी समूहले काम गरिरहेको छ। तत्कालीन सरकारले प्रतिशोधको रूपमा मुद्दा चलाएको थियो। अहिलेको सरकारको वास्तविक धारणा के हो भन्ने बुझ्ने काम भइरहेको छ। ४० लाख नागरिकले हस्ताक्षर गरेका विषयमा सरकारले के कदम चालिरहेको छ भनेर पनि हामी बुझ्दै छौं।”
अर्यालले चुनावअघि पार्टीको मुद्दा र एजेन्डा मिल्ने शक्तिहरूसँग एकता गर्ने विषयमा पनि कार्यदल सक्रिय रहेको बताए। उनले रास्वपाको दृष्टिले मुद्दा न्यायिक प्रक्रियामा पारदर्शिता र निष्पक्षताका साथ अघि बढ्नुपर्नेमा जोड दिए।
