नेकपा (एमाले) को नयाँ नेतृत्व चयनका लागि आज बिहान ८ बजेदेखि मतदान सुरु हुने भएको छ। यसअघि मङ्गलबारका लागि तय गरिएको मतदान प्राविधिक कारणले स्थगित भएपछि बुधबारका लागि पुनः कार्यतालिका बनाइएको हो।
मङ्गलबार साँझसम्म मतदानको प्रतीक्षामा प्रतिनिधिहरू लाइनमा बसेका थिए। तर राति करिब ८ बजे निर्वाचन आयोगले प्राविधिक तयारी पूरा नभएको जनाउँदै मतदान आजका लागि सारिएको जानकारी दिएको थियो।
एमाले महासचिव शंकर पोखरेलका अनुसार उम्मेदवार नामावलीमा युनिकोड र प्रिति फन्ट एकैसाथ प्रयोग हुँदा विद्युतीय प्रणालीमा समस्या देखिएको थियो। नामावलीलाई पूर्ण रूपमा युनिकोडमा रूपान्तरण गरी पुनः परीक्षण गर्न समय लागेकाले आयोगको निर्देशनअनुसार एक दिन मतदान स्थगित गरिएको उनले बताए।
११औँ महाधिवेशनमार्फत एमालेले नयाँ नेतृत्व चयन गर्न लागेको हो। अध्यक्ष पदका लागि केपी शर्मा ओली र ईश्वर पोखरेल चुनावी प्रतिस्पर्धामा छन्। आज हुने मतदानबाट पार्टीको भावी नेतृत्वको टुंगो लाग्ने अपेक्षा गरिएको छ।
