नेकपा एमालेको जारी महाधिवेशनअन्तर्गत नेतृत्व चयनका लागि भइरहेको निर्वाचनमा मतदानको प्रक्रिया अपेक्षाकृत सुस्त देखिएको छ। बुधबार बिहान १० बजे सुरु भएको मतदानमा राति १० बजेसम्म करिब १२ घण्टाको अवधिमा झन्डै १ हजार ३ सय मत मात्र खसेको छ।
मतदानको गति ढिलो भएपछि पार्टीको निर्वाचन आयोगले मतदान केन्द्र प्रवेश गर्ने समय राति १२ बजेसम्मका लागि थप गरेको छ। नेता शंकर पोखरेलले सामाजिक सञ्जालमार्फत निर्वाचन आयोगले समय विस्तार गरेको जानकारी दिएका हुन्।
महाधिवेशनस्थलमा मतदानका लागि ८० वटा विद्युतीय भोटिङ मेसिन प्रयोगमा ल्याइएको छ। देशभरबाट सहभागी २ हजार २ सय ६३ महाधिवेशन प्रतिनिधिले मतदान गर्दै छन्। मतदानको व्यवस्थापन सहज बनाउन बाँकी प्रतिनिधिहरूलाई टोकन (कुपन) वितरण गरिएको छ।
लामो लाइनका कारण मतदान गर्न समय लाग्ने भएपछि एक पटकमा ५० जनालाई मात्र मतदान केन्द्रमा प्रवेश गराइँदै आएको छ। एक जना प्रतिनिधिले मतदान गर्न औसतमा २५ देखि ४० मिनेटसम्म समय लाग्ने बताइएको छ।
काठमाडौँको भृकुटीमण्डपमा भइरहेको यो निर्वाचनमार्फत १९ पदाधिकारीसहित ३०१ सदस्यीय केन्द्रीय कमिटी चयन हुँदैछ। यसका लागि ६ सय ४२ उम्मेदवार प्रतिस्पर्धामा छन्। अध्यक्ष पदमा केपी शर्मा ओली र ईश्वर पोखरेलबीच प्रतिस्पर्धा भइरहेको छ भने महासचिव पदका लागि शंकर पोखरेल र सुरेन्द्र पाण्डेबीच प्रतिस्पर्धा जारी छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
