राष्ट्रिय स्वतन्त्र पार्टी (रास्वपा)का सभापति रवि लामिछाने र काठमाडौँ महानगरपालिकाका प्रमुख बालेन साहबीच मध्यरातसम्म चलेको भेटवार्ता सकारात्मक वातावरणमा सम्पन्न भएको नेताहरूले बताएका छन्।
सोमबार राति काठमाडौँस्थित रास्वपा नेता असिम साहको म्युजिक कम्पनी जी–२१ को कार्यालयमा दुवैबीच करिब छ घण्टा छलफल भएको हो। भेटपछि रवि र बालेन एउटै गाडीमा सँगै बाहिरिएको दृश्यले पनि वार्ताको सौहार्दपूर्ण स्वरूपलाई संकेत गरेको छ।
भेटवार्तामा सहभागी असिम साहका अनुसार छलफल शान्त र मैत्रीपूर्ण वातावरणमा भएको थियो। यद्यपि छलफलमा उठेका ठोस विषय सार्वजनिक नगरिए पनि राजनीतिक सहकार्य, आगामी दिनमा मिलेर अघि बढ्ने आवश्यकता र समन्वयका विषयमा सकारात्मक संवाद भएको नेताहरूको भनाइ छ। पछिल्लो समय देखिएको राजनीतिक दूरी कम गर्ने प्रयासका रूपमा पनि यस भेटलाई हेरिएको छ।
भेटको समन्वय गरेका असिम साहले सामाजिक सञ्जालमार्फत प्रतिक्रिया दिँदै लेखेका छन्, “अन्ततः कथाको सुखद सुरुवात भएको छ। रवि र बालेन—दुई दाजु–भाइको मिलन भएको छ। यो व्यक्तिको मात्र होइन, देशले खोजेको आशाको मिलन हो। हामी सबै नेपालीलाई बधाई।”
नेताहरूका अनुसार वार्ताले आगामी दिनमा राजनीतिक संवाद र सहकार्यको सम्भावनालाई थप बल दिएको छ, यद्यपि त्यसको औपचारिक स्वरूपबारे भने कुनै जानकारी सार्वजनिक गरिएको छैन।
