प्रतिनिधिसभा सदस्य निर्वाचनका लागि आज (सोमबार)देखि औपचारिक रूपमा प्रचार–प्रसार गर्न पाइने भएको छ। मतदान हुने दिनभन्दा १५ दिन अघिदेखि मात्र निर्वाचन प्रचार–प्रसारअन्तर्गत जुलुस, आमसभा, कोणसभा गर्न तथा सञ्चारमाध्यममा निर्वाचनसम्बन्धी सामग्री प्रकाशन वा प्रसारण गर्न सकिने व्यवस्था छ।
सोही व्यवस्थाअनुसार आजदेखि फागुन १८ गते राति १२ बजेसम्म राजनीतिक दल तथा उम्मेदवारहरूले निर्वाचन प्रचार–प्रसार गर्न सक्नेछन्। निर्वाचनको निष्ठालाई उच्च प्राथमिकतामा राखेर दल, उम्मेदवार र अन्य सरोकारवालाले निर्वाचन आचारसंहिताको पूर्ण पालना गरी प्रचार–प्रसार गर्नुपर्ने जनाइएको छ। यस अवधिमा राजनीतिक दलका उम्मेदवारले औपचारिक रूपमा मतदातासमक्ष मत माग्न पाउनेछन्।
निर्वाचन आयोगले आचारसंहिता कार्यान्वयन तथा अनुगमनका लागि विभिन्न संयन्त्र परिचालन गरिरहेको जनाएको छ। आचारसंहिता उल्लङ्घन भएको खण्डमा राजनीतिक दल तथा उम्मेदवारलाई पत्र काटेर स्पष्टीकरण सोधिने र आवश्यक परे कानुनी कारबाही गरिने आयोगले स्पष्ट पारेको छ।
आचारसंहिता राजनीतिक दल तथा सरोकारवाला पक्षसँग व्यापक छलफलपछि तर्जुमा गरिएको आयोगले स्मरण गराएको छ। सबै राजनीतिक दलहरूले आचारसंहिताको पूर्ण पालना गर्ने प्रतिबद्धता जनाएका छन्।
कार्यवाहक प्रमुख निर्वाचन आयुक्त रामप्रसाद भण्डारीले आचारसंहिता उल्लङ्घनका घटनामा आयोगले शून्य सहनशीलता नीति अवलम्बन गरेको जानकारी दिनुभयो। उल्लङ्घनकर्तालाई स्पष्टीकरण सोधिने र प्रमाण तथा अवस्थाअनुसार सचेत, दण्डजरिवाना वा उम्मेदवारी खारेजीसम्मको कानुनी व्यवस्था रहेको उहाँले बताउनुभयो।
दल तथा उम्मेदवारले तोकिएको मापदण्डअनुसार पत्रपत्रिका र अनलाइन सञ्चारमाध्यममा विज्ञापनमार्फत प्रचार–प्रसार गर्न सक्नेछन्। आमसभा वा कोणसभा गर्दा मञ्च तयारीमा लागेको खर्चको विवरण सम्बन्धित उम्मेदवारले आफैँ वा प्रतिनिधिमार्फत निर्वाचन कार्यालयमा पेस गर्नुपर्ने व्यवस्था छ।
निर्वाचनको समयमा कुनै पनि दल वा उम्मेदवारविरुद्ध तथा निर्वाचनलाई प्रतिकूल असर पार्ने उद्देश्यले सामाजिक सञ्जाल वा अनलाइन माध्यमबाट मिथ्या सूचना, दुष्प्रचार र द्वेषपूर्ण अभिव्यक्ति दिन नपाइने आयोगले जनाएको छ।
