नेपाली कांग्रेस ले बुधबार जनकपुरमा आमसभा आयोजना गरी चुनावी घोषणापत्र सार्वजनिक गर्ने भएको छ। कार्यक्रममा एक लाखभन्दा बढी मानिसको सहभागिता रहने दाबी गरिएको छ।
कांग्रेस मधेश प्रदेश सभापति कृष्णप्रसाद यादव ले उक्त जानकारी दिँदै सभापति गगन थापा लाई भावी प्रधानमन्त्रीका रूपमा अघि सारिएको बताए। उनले मधेशको अवस्थालाई नजिकबाट नियाल्नका लागि सार्लाही–४ बाट उम्मेदवार बनाइएको पनि उल्लेख गरे।
“व्यवस्था होइन, अवस्था फेर्नुपर्छ भनेर लागेका छौँ। आसन्न निर्वाचनमा उहाँको भिजन, गन्तव्य र दृष्टिकोण समेटेर प्रतिबद्धतापत्र तयार गरेका छौँ। भावी प्रधानमन्त्रीका रूपमा सिफारिस गरेका छौँ। मधेश प्रदेशको स्थितिलाई नजिकबाट हेरेर काम गर्न सहज होस् भनेर यहाँ बोलाएका हौँ,” यादवले भने।
उनले मधेशले प्रजातन्त्रका लागि दिएको योगदान र कांग्रेसको उर्वर भूमिको रूपमा रहेकाले आग्रह गरेर उम्मेदवार बनाइएको बताए।
मधेश सभापति यादवले भावी प्रधानमन्त्रीका रूपमा खुला बहस गर्न कांग्रेस तयार रहेको पनि बताए।
