नेपाली कांग्रेसले आज आइतबार काठमाडौँ उपत्यकामा ६ वटा चुनावी सभा गर्ने भएको छ। ती सभामा पार्टी सभापति गगनकुमार थापा, उपसभापति विश्वप्रकाश शर्मा र प्रवक्ता देवराज चालिसेले सम्बोधन गर्ने कार्यक्रम रहेको छ।
दिउँसो १ बजे काठमाडौँ क्षेत्र नम्बर १० अन्तर्गत कीर्तिपुरमा चुनावी सभा आयोजना गरिएको छ। उक्त सभामा सभापति गगनकुमार थापा र प्रवक्ता देवराज चालिसेले सम्बोधन गर्नेछन्। काठमाडौँ १० मा कांग्रेसले जिल्ला सदस्य हिमाल कार्कीलाई उम्मेदवार बनाएको छ।
दिउँसो २ बजे भक्तपुरको ठिमीमा हुने सभालाई उपसभापति विश्वप्रकाश शर्माले सम्बोधन गर्ने तालिका छ। भक्तपुर २ मा कांग्रेसले वरिष्ठ पत्रकार कबिर राणालाई उम्मेदवार बनाएको छ।
त्यसैगरी, काठमाडौँ निर्वाचन क्षेत्र नम्बर २ अन्तर्गत पेप्सीकोला टाउनप्लानिङमा हुने चुनावी सभामा पनि उपसभापति शर्माले सम्बोधन गर्नेछन्। उक्त क्षेत्रमा युवा नेता कबिर शर्मा उम्मेदवार छन्।
दिउँसो ३ बजे काठमाडौँ क्षेत्र नम्बर ७ को बालाजु चोकमा हुने सभामा सभापति थापा र प्रवक्ता चालिसेले सम्बोधन गर्ने कार्यक्रम छ। यस क्षेत्रमा युवा नेता प्रमोदहरि गुरागाईँ उम्मेदवार रहेका छन्।
दिउँसो ३ः३० बजे काठमाडौँ क्षेत्र नम्बर ५ र ६ को संयुक्त चुनावी सभा सभामुखी चोकमा आयोजना हुनेछ। काठमाडौँ ५ मा महामन्त्री प्रदीप पौडेल र काठमाडौँ ६ मा जिल्ला सभापति सबुज बानिया उम्मेदवार छन्। उक्त संयुक्त सभालाई पनि सभापति थापा र प्रवक्ता चालिसेले सम्बोधन गर्नेछन्।
दिउँसो ४ बजे काठमाडौँ क्षेत्र नम्बर ४ को बालुवाखानीमा हुने चुनावी सभामा सभापति गगनकुमार थापाले सम्बोधन गर्ने तालिका रहेको छ। काठमाडौँ ४ मा कांग्रेसले क्रिकेट कमेन्टेटर तथा युवा नेता सचिन तिमल्सेनालाई उम्मेदवार बनाएको छ।
