अमेरिका–इजरायल र इरानबीच जारी सैन्य द्वन्द्व चौथो दिनमा प्रवेश गरेको छ। अमेरिकी राष्ट्रपति डोनाल्ड ट्रम्पले इरान वार्ता गर्न इच्छुक रहे पनि अब ढिलो भइसकेको टिप्पणी गरेका छन्।
सामाजिक सञ्जालमार्फत ट्रम्पले इरानको रक्षा प्रणाली र नेतृत्व संरचना लगभग ध्वस्त भइसकेको दाबी गरेका छन्। उनले इरानको एयर डिफेन्स, एयर फोर्स र नेवी ठूलो क्षतिमा परेको बताएका छन्। यसअघि आइतबार भने उनले इरानी नेताहरूसँग वार्ताका लागि आफू तयार रहेको संकेत दिएका थिए। यसबाट अमेरिकी धारणा र रणनीतिबारे मिश्रित सन्देश गएको विश्लेषण गरिएको छ।
उता, रुसी राष्ट्रपति भ्लादिमीर पुटिनले इरानसँग वार्ता गर्ने तयारी गरेका छन्। मध्यपूर्व क्षेत्रमा भइरहेको आक्रमण रोक्ने र बढ्दो तनाव कम गर्ने उद्देश्यले कूटनीतिक पहल अघि बढाइएको जनाइएको छ।
पुटिनले साउदी अरेबियाका क्राउन प्रिन्स मोहम्मद बिन सलमान र कतारका अमिर शेख तमीम बिन हमद अल थानीसँग टेलिफोन वार्ता गरिसकेका छन्। दुवै नेताले जारी द्वन्द्वका गम्भीर परिणामबारे चिन्ता व्यक्त गर्दै तनाव घटाउन कूटनीतिक प्रयास आवश्यक रहेको धारणा राखेका छन्।
लगातार चर्किँदै गएको यस द्वन्द्वले मध्यपूर्व क्षेत्रको सुरक्षा अवस्था थप जटिल बनाएको छ। अन्तर्राष्ट्रिय समुदायले संयमता अपनाउन र वार्ताको मार्ग रोज्न आह्वान गरिरहेको छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
