बाँफिकोट गाउँपालिका–३ भाग्ले नजिक सानीभेरी नदीमा दुई किशोरीको शव फेला परेको छ।
आज बिहान दुई फरक स्थानमा ती किशोरीको शव फेला परेको जिल्ला प्रहरी कार्यालय रुकुमपश्चिम ले जनाएको छ। प्रहरीका अनुसार करिब पाँच सय मिटरको दूरीमा दुई शव भेटिएका हुन्।
कार्यालयका सूचना अधिकारी हरिप्रसाद पुन का अनुसार शवको पहिचान भइसकेको छ। फेला परेका शव बाँफिकोट गाउँपालिका–३ गरालागोठ निवासी १४ वर्षीया कल्पना ओली र १२ वर्षीया उर्मिला ओलीका हुन्। दुवैको शव भेरी नदी किनारमा तैरिएको अवस्थामा भेटिएको प्रहरीले जनाएको छ।
प्रहरीका अनुसार सोमबार बेलुका तीन जना किशोरी छिमेकी गाउँमा लागेको विवाहमा जाने भन्दै घरबाट निस्किएका थिए। विवाहबाट फर्कने क्रममा उनीहरू बेपत्ता भएका थिए।
उनीहरूसँगै गएकी १३ वर्षीया सपना ओलीको भने अवस्था अझै अज्ञात रहेको प्रहरी निरीक्षक पुनले जानकारी दिएका छन्।
विवाहबाट फर्कने क्रममा उनीहरूलाई नदीले बगाएको हुन सक्ने आशंका गरिएको छ। घटनास्थलमा प्रहरी निरीक्षक पुनको नेतृत्वमा प्रहरी टोली खटिएको छ। यसअघि अस्थायी प्रहरी पोष्ट छिनखेत बाट पनि प्रहरी टोली घटनास्थलमा परिचालन गरिएको थियो।
घटनाको थप विवरण आउन बाँकी रहेको र अनुसन्धान सुरु गरिएको प्रहरीले जनाएको छ।
