जनमत पार्टीका अध्यक्ष सिके राउतले अब संसदीय चुनाव नलड्ने बताएका छन्। प्रतिनिधिसभा निर्वाचनमा पराजयपछि उनले संसदीय राजनीतिबाट टाढा रहने घोषणा गरेका हुन्।
सामाजिक सञ्जालमार्फत धारणा सार्वजनिक गर्दै राउतले आफू अब कुनै पनि संसदीय चुनावमा सहभागी नहुने स्पष्ट पारेका छन्। तर राजनीतिबाट भने टाढा नहुने र संघर्षको राजनीति जारी राख्ने उनको भनाइ छ। उनले पार्टीलाई आवश्यकता रहेसम्म नेतृत्व गर्दै अगाडि बढ्ने पनि बताएका छन्।
राउतले यसअघि दुई पटक व्यक्तिगत इच्छाविपरीत संसदीय चुनाव लडेको दाबी गरेका छन्। ‘दुईपटक व्यक्तिगत इच्छाविपरीत संसदीय निर्वाचन लडें, एक पटक जीतें, एक पटक हारें। तर दुईटै पटक निर्वाचनमा भाग लिने निर्णयबाट खुशी नै छु,’ उनले लेखेका छन्।
उनका अनुसार २०७५ सालमा ‘स्वतन्त्र मधेश गठबन्धन’ लाई सरकारले काम गर्न नदिएपछि पार्टी खोल्ने निर्णय गरिएको थियो। त्यसपछि साथीहरूको आग्रहका कारण आफू नै जनमत पार्टीको अध्यक्ष बन्नुपरेको उनले बताएका छन्।
यसपटक भने आफू चुनाव नलड्ने सोच बनाएको उनले उल्लेख गरेका छन्। सप्तरी–१ र सप्तरी–२ का लागि उम्मेदवार खोज्दा अन्तिम समयसम्म अन्य उम्मेदवारलाई अघि सार्ने प्रयास गरिएको उनले बताएका छन्। तर पार्टीका नेता तथा समर्थकहरूको आग्रहपछि अन्तिम समयमा आफू उम्मेदवार बनेको राउतले बताएका छन्।
उनले आफू चुनाव नलडेको भए पार्टीका उम्मेदवार र कार्यकर्ताको मनोबल घट्ने र त्यसको दोष आफूमाथि आउने अवस्था बन्ने भएकाले अन्ततः उम्मेदवार बन्नु परेको उल्लेख गरेका छन्।
अब भने संसदीय पदको राजनीतिबाट टाढा रहने उनले स्पष्ट पारेका छन्। तर राजनीतिमा सक्रिय रहँदै आफ्नो सिद्धान्त र एजेन्डालाई अगाडि बढाउने तथा जनताको अधिकार र पहिचानका लागि निरन्तर संघर्ष गर्ने उनले बताएका छन्।
साथै, उनले जनमत पार्टीलाई आगामी स्थानीय र प्रदेश निर्वाचनका लागि तयारी गराउने प्रतिबद्धता पनि व्यक्त गरेका छन्। उनले आफू सधैं जनताको बीचमा रहने र अधिकारको लडाइँमा साथ दिने बताएका छन्।
