नवनियुक्त प्रधानमन्त्री बालेन्द्र शाह (बालेन) नेतृत्वको १५ सदस्यीय मन्त्रिपरिषद्‌मा गृहमन्त्री सुधन गुरुङको स्थान विशेष रूपमा महत्वपूर्ण देखिएको छ। पार्टीका दिग्गज र अनुभवी अनुहारहरूलाई पछि पार्दै गुरुङले सरकारको तेस्रो वरीयतासहित गृह मन्त्रालयको जिम्मेवारी सम्हालेका छन्।

मन्त्रिपरिषद्‌को वरीयताक्रमअनुसार प्रधानमन्त्री बालेन पहिलो र अर्थमन्त्री डा. स्वर्णिम वाग्ले दोस्रो स्थानमा छन्। त्यसपछि तेस्रो वरीयतामा गृहमन्त्री गुरुङ रहेका छन्, जसले उनको राजनीतिक हैसियत र सरकारभित्रको प्रभाव स्पष्ट रूपमा देखाउँछ।

गृह मन्त्रालय देशको आन्तरिक सुरक्षा, शान्ति सुव्यवस्था कायम राख्ने र ७७ वटै जिल्लामा प्रशासनिक संयन्त्र परिचालन गर्ने प्रमुख निकाय हो। यस्तो महत्वपूर्ण मन्त्रालयको जिम्मेवारी पाउनु गुरुङका लागि ठूलो अवसरका साथै चुनौती पनि मानिएको छ।

अर्थमन्त्री वाग्लेको नीतिगत दक्षता र गृहमन्त्री गुरुङको कार्यान्वयन क्षमता मिलेर बालेन नेतृत्वको सरकारको सफलता वा असफलता निर्धारण हुने चर्चा राजनीतिक वृत्तमा सुरु भएको छ।