सोमपाल कामी र गुल्शन झा चोटका कारण लिग २ र टी–२०आई शृंखलाबाट बाहिर
नेदरल्याण्ड्ससँग जारी आईसीसी विश्वकप लिग २ एकदिवसीय श्रृंखला र आगामी टी–२० अन्तर्राष्ट्रिय शृंखलाका लागि नेपाली क्रिकेट टिमलाई ठूलो झटका लागेको छ। प्रशिक्षण सत्रका क्रममा चोटि परेका सोमपाल कामी र गुल्शन झा अब बाँकी खेल खेल्न नसक्ने भएका छन्।
नेपाल क्रिकेट संघ (क्यान) का अनुसार सोमपालको दायाँ हातमा र गुल्शनको घुँडामा चोट लागेको हो। चिकित्सकको सल्लाहअनुसार उनीहरूलाई तत्काल उपचारमा राखेर पूर्ण विश्राम दिने निर्णय गरिएको छ।
हालसम्मको प्रदर्शनमा दुबै खेलाडी नेपालका लागि प्रभावशाली रहे। सोमपालले अघिल्लो खेलमा ब्याटिङमा उत्कृष्ट योगदान दिँदै ६७ रन बनाएका थिए, तर नेपाल २ रनले पराजित भएको थियो। गुल्शनले भने पहिलो खेलमा करण केसीसँग साझेदारी गर्दै नेपाललाई ऐतिहासिक जित दिलाउने महत्वपूर्ण भूमिका खेलेका थिए।
दुवै खेलाडीको अनुपस्थितिले नेपाललाई बाँकी लिग २ खेलहरू र आगामी टी–२०आई शृंखलामा दबाबमा पार्न सक्छ।
