नेकपा एमालेका अध्यक्ष एवं पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकको बन्दी प्रत्यक्षीकरण (हाबस कोर्ट) निवेदनको सुनुवाइ आइतबार सर्वोच्च अदालतमा हेर्दाहेर्दैमा राखिएको छ।
आइतबार न्यायाधीश विनोद शर्मा र सुनिल पोखरेलको संयुक्त इजलासमा पेसी तोकिए पनि सुनुवाइ सकिन नसकेपछि निवेदन सोमबारका लागि हेर्दाहेर्दैमा राखिएको सर्वोच्च अदालतका प्रवक्ता अर्जुनप्रसाद कोइरालाले जानकारी दिए।
ओली र लेखकलाई जेएनजी आन्दोलनको घटनासम्बन्धी जाँचबुझका लागि गठित गौरीबहादुर कार्की आयोगको सिफारिसअनुसार प्रहरीले चैत १४ गते बिहानै हिरासतमा राखेको थियो।
पक्राउ गैरकानुनी भएको दाबी गर्दै ओलीको तर्फबाट उनकी पत्नी राधिका शाक्य र लेखकको तर्फबाट यशोधा थापाले रिहाइ माग गर्दै चैत १५ गते सर्वोच्चमा बन्दी प्रत्यक्षीकरण रिट दायर गरेका थिए। चैत १६ गते सर्वोच्चले विपक्षी सरकारका नाममा कारण देखाऊ आदेश जारी गरेको थियो।
सरकार पक्षबाट लिखित जवाफ आइसकेकोले सुनुवाइ अगाडि बढेको हो। त्यस्तै, प्रहरीले अझै उनीहरूलाई हिरासतमा राख्न म्याद थपका लागि जिल्ला अदालत काठमाडौँमा निवेदन पेश गरेको छ। जिल्ला अदालतको आदेश आउन बाँकी छ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
