नेपाली कांग्रेसभित्रको आधिकारिकता विवाद र १५ औँ महाधिवेशनको कार्यतालिकासम्बन्धी दुवै रिट निवेदनमाथि सर्वोच्च अदालतमा एउटै इजलासमा सुनुवाइ हुने भएको छ।

दुवै मुद्दाको पेसी शुक्रबारका लागि तोकिएको छ। अदालतले मूल मुद्दा र पूरक निवेदनलाई एकैसाथ एउटै इजलासमा पेसी चढाएको हो।

यो सुनुवाइ कामु प्रधानन्यायाधीश सपना प्रधान मल्ल र न्यायाधीश मेघराज पोखरेलको इजलासमा हुने भएको छ। उक्त मुद्दा पेसी सूचीको ९ औँ नम्बरमा रहेको छ।

यसअघि निर्वाचन आयोगले गगन थापा र विश्वप्रकाश शर्मा नेतृत्वको समूहलाई आधिकारिकता दिने निर्णय गरेको विषयमा सभापति शेरबहादुर देउवा पक्ष सर्वोच्च अदालत पुगेको थियो। सो मुद्दा विचाराधीन रहेको अवस्थामा अर्को पक्षले महाधिवेशन प्रक्रिया अघि बढाएको भन्दै विवाद थपिएको हो।

देउवा पक्षले पार्टीको आधिकारिकता विवाद नटुंगिँदासम्म १५ औँ महाधिवेशनको घोषित कार्यतालिका कार्यान्वयन नगर्न माग गर्दै पूरक निवेदन दर्ता गरेको छ।

विशेष महाधिवेशनबाट बनेको समितिले आगामी असोज १६ देखि १९ सम्म महाधिवेशन गर्ने र वैशाख १ देखि सदस्यता अभियान सुरु गर्ने तयारी गरेपछि सो प्रक्रिया रोक्न माग गरिएको हो।