प्रधानमन्त्री बालेन्द्र शाह (बालेन) को भारत भ्रमणको तयारी सुरु भएको छ। भारतीय प्रधानमन्त्री नरेन्द्र मोदीले निमन्त्रणा दिएपछि नेपाल सरकारले आन्तरिक तयारी अघि बढाएको हो।

यद्यपि यसबारे औपचारिक घोषणा भने अझै गरिएको छैन।

परराष्ट्रमन्त्री शिशिर खनालका अनुसार भारतीय प्रधानमन्त्री मोदीले शुभकामना सन्देशमार्फत प्रधानमन्त्री बालेनलाई भारत भ्रमणको निम्तो दिएका थिए। सो निमन्त्रणा प्रधानमन्त्री बालेनले स्वीकार गरिसकेको उनले बताएका छन्।

हाल मौरिससमा आयोजित नवौँ हिन्द महासागर सम्मेलनमा सहभागी रहेका परराष्ट्रमन्त्री खनालले भारतीय सञ्चारमाध्यम विअनसँगको कुराकानीमा उक्त जानकारी दिएका हुन्।

उनका अनुसार भ्रमणको मिति र समय भने दुबै देशका सम्बन्धित संयन्त्रमार्फत तय गरिनेछ।

परराष्ट्रमन्त्री खनालले भारतका विदेशमन्त्री एस. जयशंकरसँग भेटवार्ता समेत गरेका छन्। भेटमा दुई देशबीचका सम्बन्ध र नयाँ सरकारका प्राथमिकताबारे छलफल भएको उनले बताएका छन्।