राष्ट्रिय क्रिकेटर करण केसीले सामाजिक सञ्जालमा लेखेको विवादित स्टाटसलाई लिएर नेपाल क्रिकेट संघ (क्यान) ले औपचारिक निर्णय सार्वजनिक गर्ने तयारी गरेको छ।

करण केसी आज प्रधानमन्त्री कपअन्तर्गतको खेलमा सहभागी भएका छैनन्।

उनले हिजो फेसबुकमा अम्पायरहरूलाई लक्षित गर्दै धम्कीपूर्ण शैलीको स्टाटस लेखेका थिए। उक्त पोस्टमा उनले कुनै खेलाडीले गल्तीले अम्पायरलाई प्रहार गरेमा कति म्याच प्रतिबन्ध हुन्छ भन्ने प्रश्न उठाएका थिए।

पोस्ट सार्वजनिक भएलगत्तै अम्पायर तथा स्कोरर संघले आकस्मिक बैठक बसेर विज्ञप्ति जारी गर्दै आपत्ति जनाएको थियो।

क्यान उच्च स्रोतका अनुसार करणलाई आजको खेल नखेल्न भनिएको थियो, सोही अनुसार उनी मधेश प्रदेशविरुद्धको खेलमा अनुपस्थित भएका हुन्। करण नेपाल पुलिस क्लबबाट खेल्दै आएका छन्।

क्यानले केहीबेरमै यस विषयमा औपचारिक विज्ञप्ति जारी गर्ने तयारी गरेको बताइएको छ।

यता करण केसीले विवादपछि उक्त स्टाटस हटाएर क्षमायाचना गरिसकेका छन्। तर अम्पायर संघका अध्यक्ष मोहम्मद सफिकले क्षमायाचनाले मात्र पर्याप्त नहुने भन्दै क्यानबाट कडा निर्णय आउनुपर्ने बताएका छन्।