परराष्ट्रमन्त्री शिशिर खनालको सम्पत्ति विवरण सार्वजनिक भएको छ। विवरण अनुसार उनको नाममा विभिन्न कम्पनीमा लगानीदेखि सुन, नगद र बैंक मौज्दातसम्म रहेको उल्लेख गरिएको छ।

विवरणअनुसार मन्त्री खनालसँग काठमाडौंको टोखा नगरपालिका–१० मा ६ आना जग्गामा बनेको घर रहेको छ। उक्त घर २०५८ सालमा ३ लाख रुपैयाँमा खरिद गरिएको भए पनि अहिले घर सूर्यभक्त खनालको नाममा रहेको देखाइएको छ।

त्यस्तै, सूर्यभक्त खनालकै नाममा तनहुँमा १५ रोपनी पैतृक जग्गा, पूर्व नवलपरासीको देवचुलीमा १३ रोपनी र नेपालगञ्जमा २ कठ्ठा जग्गा रहेको विवरणमा उल्लेख छ।

मन्त्री खनालसँग २२ तोला सुन, २५ तोला चाँदी र १० लाख रुपैयाँ नगद रहेको पनि विवरणमा देखाइएको छ।

बैंक खातातर्फ एमएमबी बैंकमा ३ लाख २० हजार, नबिल बैंकमा २ लाख १ हजार, राष्ट्रिय वाणिज्य बैंकमा २ लाख ६८ हजार, एनआईसी एशिया बैंकमा ४ लाख ५१ हजार र ग्लोबल आइएमई बैंकमा १७ हजार रुपैयाँ मौज्दात रहेको उल्लेख छ।

त्यसैगरी अच्युता अधिकारीको नाममा एभरेष्ट बैंकमा ४३ हजार र नबिल बैंकमा ४ हजार रुपैयाँ रहेको विवरणमा पनि उल्लेख गरिएको छ।

मन्त्री खनालको नाममा विभिन्न कम्पनीमा लगानी रहेको देखिएको छ। विवरणअनुसार पिक एन्ड ड्रप नेपालमा ३३ प्रतिशत, रिग्पा इन्टेल प्रालिमा १०० प्रतिशत र ताजा एग्रो फार्ममा १६ प्रतिशत स्वामित्व रहेको छ।

साथै बीपीडब्ल्यु माइक्रोफाइनान्समा २ हजार ५६० कित्ता र ओम मेगाश्री फर्मास्युटिकल्समा ५ हजार कित्ता सेयर रहेको पनि विवरणमा उल्लेख छ।