गृहमन्त्री सुधन गुरुङको सम्पत्ति विवरण सार्वजनिक भएको छ। प्रधानमन्त्री तथा मन्त्रिपरिषद् कार्यालयले सार्वजनिक गरेको विवरणअनुसार उनको र परिवारको नाममा ठुलो परिमाणमा जग्गा, सेयर, बैंक मौज्दात, सवारी साधन र पैतृक सुन रहेको उल्लेख गरिएको छ।

विवरणअनुसार गृहमन्त्री गुरुङको व्यक्तिगत नाममा धनकुटामा १९ रोपनी १५ आना जग्गा रहेको छ। त्यस्तै उनका पिता दिलबहादुर गुरुङको नाममा चितवनमा ३० कठ्ठा जग्गा रहेको विवरणमा देखाइएको छ। परिवारिक सम्पत्तिअन्तर्गत बाजे रामसल गुरुङको नाममा गोरखाको चुमनुब्रीमा २२१ रोपनी विशाल जग्गा रहेको उल्लेख गरिएको छ।

सेयर लगानीतर्फ पनि उनको ठूलो हिस्सा रहेको विवरणमा देखिन्छ। होप होल्डिङ प्रालिमा ३० हजार कित्ता, लगुम प्रिमियर अपार्टमेन्टमा ५७ हजार कित्ता र अन्य सूचीकृत कम्पनीमा गरेर २ करोड ७४ लाख ५६ हजार रुपैयाँ बराबरको सेयर लगानी रहेको जनाइएको छ। साथै एडभेन्चर भिल्ला प्रालिमा ७० हजार कित्ता सेयर (७० लाख रुपैयाँ) समेत रहेको विवरणमा उल्लेख छ।

सवारी साधनतर्फ लगुम प्रिमियर अपार्टमेन्टको एक कार रहेको देखाइएको छ, जसको मूल्य ४७ लाख ९९ हजार रुपैयाँ रहेको जनाइएको छ।

बैंक मौज्दाततर्फ लक्ष्मी सनराइज बैंकमा ५ लाख ३५ हजार, नबिल बैंकमा ५६ लाख २५ हजार र सानीमा बैंकमा १५ सय रुपैयाँ रहेको विवरणमा उल्लेख छ।

त्यस्तै गृहमन्त्री गुरुङसँग ८९ तोला सुन रहेको पनि विवरणमा देखाइएको छ, जसलाई पैतृक सम्पत्ति भनी उल्लेख गरिएको छ।