कानुन, न्याय तथा संसदीय मामिला मन्त्री सोविता गौतमको सम्पत्ति विवरण सार्वजनिक भएको छ। प्रधानमन्त्री तथा मन्त्रिपरिषद् कार्यालयमा बुझाइएको विवरणअनुसार उनको नाममा सुन, सवारी साधन, बैंक मौज्दात, सेयर र पैतृक जग्गासहितका सम्पत्ति रहेका छन्।

विवरणअनुसार मन्त्री गौतमसँग करिब १५ तोला सुन रहेको छ। जसमा १० तोला विवाहमा प्राप्त र ५ तोला पैतृक सम्पत्ति रहेको उल्लेख गरिएको छ। साथै ९ तोला चाँदी र १ तोला हिरा पनि सम्पत्तिमा समावेश गरिएको छ।

चितवनको भरतपुर महानगरपालिकामा ६७७ वर्गमिटर जग्गा रहेको विवरणमा देखाइएको छ। उक्त जग्गा सासूससुराको नाममा रहेको पैतृक सम्पत्ति भएको जनाइएको छ।

बैंक मौज्दाततर्फ एनआईसी एसिया बैंकमा ३ लाख ६८ हजार, राष्ट्रिय वाणिज्य बैंकमा ४६ हजार ८ सय, नबिल बैंकमा ४ लाख ८१ हजार, माछापुच्छ्रे बैंकमा १ लाख ४४ हजार र ग्लोबल आईएमई बैंकमा ८ हजार २ सय रुपैयाँ रहेको उल्लेख छ।

सेयर लगानीतर्फ ग्लोबल हिमालय ट्रक एन्ड ट्रेड्समा ५० प्रतिशत स्वामित्व रहेको देखाइएको छ, जुन पैतृक सम्पत्तिबाट प्राप्त भएको भनिएको छ। त्यस्तै सोपन मल्टीपल कम्पनीमा ६ हजार ५०० कित्ता सेयर रहेको विवरणमा उल्लेख छ, जुन तलबबाट प्राप्त भएको जनाइएको छ।

सवारी साधनतर्फ मन्त्री गौतमसँग २६ लाख रुपैयाँको कार रहेको छ। साथै उनका श्रीमान् गृहेन्द्र घिमिरेको नाममा ९५ लाख रुपैयाँ मूल्यको कार रहेको विवरणमा देखाइएको छ। त्यस्तै २ लाख ७५ हजार रुपैयाँको स्कुटर पनि सम्पत्तिमा समावेश गरिएको छ।

ऋणतर्फ, उनले राष्ट्रिय वाणिज्य बैंकमा ७ लाख रुपैयाँ र एभरेस्ट बैंकमा २५ लाख रुपैयाँ ऋण रहेको विवरणमा उल्लेख गरेकी छन्।