सशस्त्र प्रहरी बलको १३ औँ महानिरीक्षक (आईजीपी) मा नारायणदत्त पौडेल नियुक्त भएका छन् ।
सोमबार बसेको मन्त्रिपरिषद् बैठकले उनलाई वैशाख १९ गतेदेखि लागू हुने गरी सशस्त्र प्रहरी प्रमुखको जिम्मेवारी दिने निर्णय गरेको हो ।
हालका आईजीपी राजु अर्यालले चार वर्षे कार्यकाल पूरा गरी वैशाख १८ गते अवकाश पाउने भएपछि सरकारले नयाँ नेतृत्व चयन गरेको हो । अर्याल २०७९ वैशाख १८ गते आईजीपी नियुक्त भएका थिए । सशस्त्र प्रहरी नियमावलीअनुसार आईजीपीको कार्यकाल चार वर्ष तोकिएको छ ।
नवनियुक्त आईजीपी पौडेल र निवर्तमान आईजीपी अर्याल नेपाल प्रहरीको १११ औँ ब्याचका अधिकृत हुन् । उनीहरू २०५४ सालमा प्रहरी सेवामा प्रवेश गरेका थिए र २०५८ सालमा सशस्त्र प्रहरी बल गठन हुँदा सोही संगठनमा समायोजन भएका थिए ।
सरकारले सशस्त्र प्रहरी नियमावली २०७२ अनुसार ज्येष्ठता, कार्यकुशलता, नेतृत्व क्षमता तथा व्यवस्थापकीय दक्षताका आधारमा पौडेललाई आईजीपी नियुक्त गरेको जनाएको छ ।
आईजीपी पदका लागि पौडेलसँगै एआईजी बंशीराज दाहाल पनि प्रतिस्पर्धामा थिए । तर, बढुवाको क्रम र वरिष्ठताका आधारमा पौडेल अगाडि परेका हुन् ।
नवनियुक्त आईजीपी पौडेल सुर्खेत वीरेन्द्रनगर नगरपालिका–१३ का स्थायी बासिन्दा हुन् । हाल उनी काठमाडौंको टोखामा बसोबास गर्दै आएका छन् ।
उनले त्रिभुवन विश्वविद्यालयबाट जनप्रशासन (एमपीए) मा स्नातकोत्तर गरेका छन् । पौडेलले सशस्त्र प्रहरी बलका विभिन्न महत्वपूर्ण जिम्मेवारी सम्हालिसकेका छन् । उनले कपिलबस्तु र पोखरास्थित बाहिनी मुख्यालयको कमाण्ड गरेका छन् भने विभिन्न गण र तालिम केन्द्रमा पनि नेतृत्व सम्हालेका छन् ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
