नेपाल धितोपत्र बोर्ड (सेबोन) को अध्यक्ष पद पूर्तिका लागि आवेदन खुला गरिएको छ ।
अर्थ मन्त्रालयले सार्वजनिक सूचना जारी गर्दै योग्य नेपाली नागरिकलाई सात दिनभित्र व्यक्तिगत विवरण (बायोडाटा) पेश गर्न आह्वान गरेको हो ।
सूचनाअनुसार इच्छुक उम्मेदवारहरूले सूचना प्रकाशित भएको मितिले सात दिनभित्र, अर्थात् वैशाख २१ गतेसम्म सिंहदरबारस्थित अर्थ मन्त्रालयको वित्तीय क्षेत्र व्यवस्थापन तथा संस्थान समन्वय महाशाखामा आवेदन दिनुपर्नेछ ।
अध्यक्ष पदका लागि मान्यता प्राप्त विश्वविद्यालयबाट कम्तीमा स्नातकोत्तर उपाधि हासिल गरेको हुनुपर्नेछ । साथै धितोपत्र बजार व्यवस्थापन, पूँजी बजार विकास, आर्थिक, वित्तीय, वाणिज्य, व्यवस्थापन वा कानून क्षेत्रमा कम्तीमा सात वर्षको अनुभव आवश्यक पर्ने उल्लेख गरिएको छ ।
त्यसैगरी उम्मेदवार उच्च नैतिक चरित्रको हुनुका साथै नेपाली नागरिक हुनुपर्ने र सम्बन्धित कानुनअनुसार अयोग्य नभएको व्यक्ति हुनुपर्नेछ । उमेर ३० वर्ष पूरा भई ६५ वर्ष ननाघेको हुनुपर्ने प्रावधान पनि राखिएको छ ।
भ्रष्टाचार, सम्पत्ति शुद्धीकरण लगायतका आपराधिक कसुरमा सजाय नपाएको, कालोसूचीमा नपरेको तथा कुनै विदेशी मुलुकको स्थायी बसोबास अनुमति नलिएको हुनुपर्ने मापदण्ड पनि तोकिएको छ ।
आवेदन दिँदा बायोडाटा, नागरिकताको प्रमाणपत्र, शैक्षिक योग्यताको प्रमाणपत्र तथा पेशागत अनुभव पुष्टि गर्ने कागजात अनिवार्य रूपमा पेश गर्नुपर्नेछ । साथै मन्त्रालयको वेबसाइटमा उपलब्ध ढाँचाअनुसार स्वघोषणा फाराम पनि बुझाउनुपर्नेछ ।
अर्थ मन्त्रालयले प्राप्त आवेदनका आधारमा सिफारिस समितिले संक्षिप्त सूची तयार गर्ने र आवश्यक परे थप विवरण माग गर्न सक्ने जनाएको छ । झुट्टा विवरण पेश गरेमा कानुनबमोजिम कारबाही हुने चेतावनीसमेत दिइएको छ ।
सरकारले धितोपत्र बजारको नेतृत्व चयन प्रक्रिया अघि बढाउने उद्देश्यले यो सूचना जारी गरेको जनाएको छ ।
वर्ल्ड इन्फो नेपाली एक व्यापक समाचार पोर्टल हो जसले नेपाली र अंग्रेजी दुवै भाषामा नवीनतम अपडेटहरू प्रदान गर्दछ। हामी वर्ल्ड इन्फो डट न्यूज ग्लोबलको एक हिस्सा हौं, नेपाल र विश्वभरबाट सही, समयसापेक्ष र सन्तुलित समाचारहरू प्रदान गर्न प्रतिबद्ध छौं।
प्रतिक्रिया
सम्बन्धित खवर
