काठमाडौंसहित देशका विभिन्न स्थानमा बुधबार साँझ हावाहुरीसहित वर्षा भएको छ । लुम्बिनी प्रदेशदेखि पूर्वतर्फका धेरै स्थानमा हावाहुरीसँगै वर्षा भइरहेको मौसमविद्हरूले बताएका छन् ।

मौसमविद् सञ्जीव अधिकारीका अनुसार अहिले विशेषगरी वाग्मती, लुम्बिनी र गण्डकी प्रदेशका अधिकांश स्थानमा हावाहुरीसहित वर्षा भइरहेको छ । अन्य प्रदेशका केही क्षेत्रमा पनि हावाहुरीको प्रभाव देखिएको छ ।

काठमाडौं उपत्यकामा पनि हावाहुरी चलेको छ । यहाँ प्रतिघण्टा करिब ७० किलोमिटर वेगमा हावा चलेको बताइएको छ । यो वेग प्रतिसेकेन्ड १९ मिटर बराबर हुने मौसमविद् अधिकारीले जानकारी दिए ।

अहिलेको अवस्था अनुसार अझै करिब १२ घण्टासम्म हावाहुरीको सम्भावना रहेको छ । यद्यपि देशभर एकैपटक हावाहुरी नचल्ने र फरक–फरक समयमा विभिन्न स्थानमा यसको प्रभाव देखिने बताइएको छ ।

साँझसम्म लुम्बिनी प्रदेशदेखि पूर्व क्षेत्रमा मात्रै हावाहुरी सक्रिय भए पनि रातिबाट नयाँ प्रणाली विकास हुने मौसमविद्ले बताएका छन् । सुदूरपश्चिमबाट अर्को प्रणाली विकास भई पश्चिम नेपालमा पनि हावाहुरी चल्ने अनुमान गरिएको छ ।

हालको प्रणाली पूर्वतर्फ सर्दै जाने र त्यससँगै विकसित हुने नयाँ प्रणालीका कारण रातिको समयमा पनि देशका विभिन्न भागमा हावाहुरीको प्रभाव रहने सम्भावना रहेको मौसमविद्हरूको भनाइ छ ।