सुकुम्बासी तथा अव्यवस्थित बस्ती हटाउने सरकारी कदमविरुद्ध अखिल नेपाल सुकुम्बासी संघले बिहीबार चक्काजाम गर्ने घोषणा गरेको छ।

संघले बुधबार काठमाडौँमा पत्रकार सम्मेलन गर्दै गुठी तथा बिर्ता पीडित समुदायमाथि भइरहेको कथित जबर्जस्ती उठीवास र डोजर अभियानविरुद्ध आन्दोलन चर्काउने जनाएको हो।

संघका अध्यक्ष अमर परियारले अदालतले सुकुम्वासी बस्ती खाली नगराउन अन्तरिम आदेश दिइसक्दा पनि कोहलपुरमा बस्तीमाथि डोजर चलाइएको भन्दै आपत्ति जनाए।

उनले सरकारलाई सर्वोच्च अदालतको आदेशको अवहेलना गरेको आरोप समेत लगाए। साथै, सरकारी निकाय मात्र नभई नेपाली सेना समेत विवादमा तानिने गरी हस्तक्षेपमा संलग्न भएको दाबी गर्दै त्यसको विरोधमा संघर्ष गर्ने चेतावनी दिए।

संघले यसअघि वैशाख ११ गते पहिलो चरणका आन्दोलनका कार्यक्रम सार्वजनिक गरिसकेको छ।

नयाँ कार्यक्रमअनुसार वैशाख ३१ गते बिहान ६ बजेदेखि १० बजेसम्म देशव्यापी चक्काजाम गरिनेछ। सो अवधिमा सवारी साधन सञ्चालन नगरी आन्दोलनलाई सहयोग गर्न संघले यातायात व्यवसायी तथा सर्वसाधारणलाई आग्रह गरेको छ।