प्रस्तावित प्रधानन्यायाधीश डा. मनोजकुमार शर्माले आफ्नो सिफारिस योग्यता र क्षमताको आधारमा भएको बताएका छन्। प्रधानन्यायाधीश नियुक्तिमा वरिष्ठता मात्रै निर्णायक मापदण्ड नहुने उनको तर्क छ।

मंगलबार भएको संसदीय सुनुवाइका क्रममा सांसदहरूले उठाएका प्रश्नको जवाफ दिँदै शर्माले प्रधानन्यायाधीश नियुक्तिलाई सामान्य बढुवाको रूपमा नभई संवैधानिक नियुक्तिको रूपमा बुझ्नुपर्ने धारणा राखे।

उनले भने, “प्रधानन्यायाधीशको नियुक्तिलाई बढुवाको रूपमा नलिइकन नियुक्तिको रूपमा लिनुपर्छ। यसमा वरिष्ठताको मापदण्ड बलियो आधार हुन्छ जस्तो लाग्दैन। संवैधानिक परिषद्बाट प्रक्रिया पूरा गरेर निर्णय भएको विषय भएकाले मैले धेरै बोलिरहनुपर्छ जस्तो लागेको छैन।”

सुनुवाइका क्रममा आफूविरुद्ध उठाइएको ‘नेपोबेबी’ आरोपबारे पनि शर्माले प्रतिक्रिया दिएका थिए। उनले आफ्नो न्यायिक यात्रा योग्यता र कार्यसम्पादनकै आधारमा अघि बढेको दाबी गरे।

“नेपोबेबी भन्ने विषयलाई कसरी लिने भन्ने मलाई थाहा छैन,” उनले भने, “योग्यता र क्षमताले एउटा अवधि पूरा गरेर पुनरावेदन अदालतमा न्यायाधीश नियुक्त भएको हुँ। त्यहाँ कार्यसम्पादन पूरा गरेर संविधानले पद रिक्त गरेपछि पुनः कानुन व्यवसायमा फर्किएँ र फेरि नियुक्ति पाएर सर्वोच्च आएको हुँ।”

शर्माले आफ्नो पारिवारिक सम्बन्धकै आधारमा अयोग्य भन्न नमिल्ने तर्क पनि गरे। उनले कुनै व्यक्तिको पारिवारिक नाताका कारण संवैधानिक पदका लागि अयोग्य हुने कानुनी व्यवस्था वा न्यायिक मान्यता आफूलाई जानकारी नभएको बताए।

“सबैले आ–आफ्नो धारणा बनाउन सक्छन्। तर मेरो योग्यता र क्षमतामाथि प्रश्न उठ्ने ठाउँ छैन,” उनले भने।

प्रधानन्यायाधीशमा सिफारिस भएपछि शर्माको नामलाई लिएर न्यायिक वृत्त र राजनीतिक क्षेत्रमा विभिन्न बहस भइरहेको छ। अहिले उनको संसदीय सुनुवाइ प्रक्रिया जारी रहेको छ।